အသက်ရှူမဝတဲ့ကဗျာ

စေစားလွန်းတဲ့ ကံတရားက အရိပ်နေနေ အခက်ချိုးချိုး
လောဘပဒေသာပင်ကြီးက သားရေပေါ်အိပ်သားရေနားစား
မကျေနပ်မှုတွေ ငြိမ်းချမ်းစွာနဲ့ပဲ ဆန္ဒပြ
လေထဲပစ်တဲ့ခဲကလည်း ပလုံခနဲထမြည်လို့မြည်
ခံစားချက်တွေက မြို့ပတ်ရထားတစ်ပတ် လက်မှတ်မပါပဲစီး
အိပ်မက်တွေက တရေးနိုးလို့ လမ်းထလျှောက်
ကုန်ဈေးနှုန်းတွေက ဆင်စီးလို့မြင်းရံနေတယ်
လူငယ်တွေက အဆီစားလို့အသားဖြစ်မထွန်း
သစ္စာတရားဆိုတာက ဘာကျက်ကျက်စားတဲ့ခေတ်
ရာသီဥတုက အနတ္တတရားကိုအပိုင်စားယူထားခဲ့
အလင်းရောင်တွေက နေ့မြင်ညပျောက်
ဝါဒတွေက သဘာဝနဲ့ အတိုက်အခံလုပ်
ကတ္တရာလမ်းတွေက ဆီမထည့်တဲ့ တံခါးလိုအော်
အဲဒါ အသက်ရှူလမ်းကြောင်း ပိုးကောင်ဝင်နေတဲ့အရပ်ပေါ့ဗျာ..။

ကျော်ဦး (လှိုင်)