မိုးမိုး အင်တာဗျူး

မိုက်မဲမှုတွေမှာ ပင်ပန်းနေပေမယ့် အခုထိတော့ မိုက်နေဆဲ မိုက်မှလည်းရမယ်
သမီးကအရူးပါ အရူးမှန်းသိသူအတွက် အရူးပျောက်ဆေး ဘယ်နားမှာရမလဲ
ဖွင့်ထားတဲ့အရိပ်တွေမှာ နားခိုဖို့သူတို့က ကိုယ်ကျင့်တရားတွေ ရွှေရည်စိမ်ထားတယ်
တစ်နှစ်စာကို ဆယ်ရက်နဲ့ပြီးတဲ့ ပညာရေးမှာ ထောက်ခံစာတစ်ခု သမီးမှာရှိတယ်
သောနုတ္ထိုရ်တွေပေါတဲ့ခေတ် ဆုံးရှုံးမှုအတွက် ဘယ်သူကမှ လျော်ကြေးမပေးဘူး
စာရိတ္တနုံနဲ့နေခဲ့တာ မဟုတ်ပါဘူး
ကံတရားအလိုကျ လျှောက်နေခဲ့တာလည်း မဟုတ်ပါဘူး
ငတ်မွတ်မှုတွေက အပေါင်းနဲ့အသင်းနဲ့လာတဲ့အခါ အူတွေအခွေလိုက် အစာရှာထွက်တဲ့အခါ ဘဝနာကျ သွားတာပါ
တကယ့်ကို စားစရာအရှာခက်နေလို့ပါ အလုပ်တွေက သမီးကို နာကြည်းနေတယ်
အခုအလုပ်မှာ သမီးက နေ့နဲ့ည အရောင်းမြှင့်တင်ရေး ဝန်ထမ်း
ဈေးစကားပြောဖို့နေရာအတွက် ဘယ်သူမှမပေးပဲ နေရာယူထားတဲ့ ဆိုင်ရာပိုင်ရာတွေကို ခွင့်တောင်းရတယ် အခုတလော နေ့ဈေးတွေ အရောင်းမထွက် ညကတော့ အရောင်းသွက်နေတယ်
နေ့ကော်မရှင်နဲ့ ညကော်မရှင်ရဖို့ သမီးက ကျန်းမာရေး ဂရုစိုက်နေရတယ်
ညီမလေး ကျောင်းတက်ရတော့မယ်….
မောင်လေးက ခေါက်ဆွဲကြော်မှာလိုက်တယ်….
မိတ်ကပ်နဲ့နုတ်ခမ်းနီ အပေါစားရေမွှေးတံဆိပ်ကပ်ထားတဲ့ သမီးနာမည် မိုးမိုး
သူတို့အတွက်တော့ ကြွကြွရွရွနဲ့ စင်သီယာပေါ့
သမီးတို့ဝန်ထမ်းတွေမှာ ပညတ်တွေ ထပ်တိုးထားတယ်
ကဒ်အတုမှာ နာမည်အတုနဲ့ ရောင်းကုန်အတုတွေကို အစစ်တွေနဲ့ရင်းရတယ်
ငြိမ်းချမ်းရေးစီမံချက်နဲ့ ငြိမ်းချမ်းရေးတွေကဖမ်းလည်း ဆက်ကြေးပေးရင် ခပ်တည်တည်ပေါ့ ပလက်ဖောင်းတစ်ခုပေါ်က ပုရိသတွေရဲ့ စကားလုံးတွေမှာ ဆော့ကစားရမယ်
အနည်းနဲ့အများကြားမှာ တစ်ခါတစ်လေတော့ ငြင်းပယ်ခွင့်ရချင်တယ်
သူတို့ရဲ့ ဆာလောင်မှုတွေကြားမှာ ဓါးစာခံဖြစ်ခဲ့ရတာ မောင်လေးတစ်သက်
အများဘဝင်မကျတဲ့ ပလက်ဖောင်းမှာ အရှက်တရားကို ငတ်မွတ်မှုနောက်ပို့ထားခဲ့ရ
ရေတွက်လိုက်တဲ့ ပိုက်ဆံတွေမှာ အစွန်းအထင်းတွေက တစ်ပုံတစ်ပင်
ရောင်ရမ်းနေတဲ့ သောကတွေအတွက် အသွေးအသားတွေ ဖောက်သည်ပေးနေရတာပါ
 နိုင်ငံရေးအကြောင်း သမီးနားမလည်ဘူး
လောလောဆယ် လူတန်းစေ့ဖို့ ဈေးကအရမ်းကြီးနေတယ်
တစ်နေ့လုပ်မှ တစ်နပ်စာရယ်သာ ဝမ်းလည်းမဝ ခါးလည်းမလှဘူး
သမီး ဖယောင်းတိုင်ထွန်းပြီး နေရတာကို စိတ်ပျက်တယ်…
သမီးက အားလုံးကို ထမင်းနပ်မှန်စေချင်တယ်….
သမီးက ပိုလျှံလာရင် ညီမလေးနဲ့မောင်လေးအတွက် စုထားတယ်…
လူမျိုးစုံဆက်ဆံရေးထဲမှာ ထဲထဲဝင်ဝင်နေခဲ့ပေမယ် ဘယ်သူကပျော်နိုင်မှာလဲ
ခပ်နာနာဇာတ်လမ်းထဲမှာ ဘယ်သူကရော လာသနားနိုင်မှာလဲ
သမ္မတရုံကြီးကိုငေးနေရင်း နေပြည်တော်ရုံကြီးကိုငေးနေရင်း
တန်ဖိုးကြီး အဝတ်အစားတွေကိုငေးရင်း လူကုံထံတွေရဲ့ စားသောက်ဆိုင်ကိုငေးရုံသက်သက်
သွေးကြောထဲ ထိုးထည့်ထားတဲ့ အနာရင်းတွေက ထကြွလာတယ်
သိန်းရာချီတန်တဲ့ နာရီတစ်လုံးက ဟောင်းနွမ်းနေတဲ့ စာသင်ကျောင်းလေးကို လှောင်နေတယ်
သိန်းသုံးဆယ်ကျော် အရက်ပုလင်းတစ်လုံးက ယိုင်နဲ့နဲ့တဲလေးကို ကဲ့ရဲ့တယ်
သိန်းတစ်ထောင်ကျော်တန် ကားတစ်စီးက ဆင်းရဲသားရပ်ကွက်ကို ဖြတ်နင်းသွားတယ်
စား/ထား စရာမရှိ လူတန်းစားနှစ်ရပ်သာရှိတဲ့ အရပ်မှာ
သမီးတို့ဘဝတွေက စုပ်ယူတဲ့နောက်ပါသွားတဲ့ အပိုင်းအစလေးတွေသာ…။

ကျော်ဦး (လှိုင်)

ကိုယ့်ကဗျာမှာ ကိုယ့်နာမည်တပ်လိုက်တဲ့အခါ မိုက်တွင်းပိုနက်သွားတယ်

ကိုယ့်ကဗျာက ကိုယ့်ကိုပြန်မေးတယ် နေထိုင်မကောင်းဖြစ်နေလားတဲ့ စကားလုံးတွေ အစာမကြေဘူးကွာ သွေးကြောတွေ တဆတ်ဆတ်တုန်နေတယ် ဘန်းစကားအဘိဓါန်အရ လန်ထွက်နေတဲ့အတ္တတွေက ဘောက်ချာဝိုင်းစုတ်လိုက်ကြတာ မျှော်လင့်ချက်တွေကို သေစာရင်းထဲ အသွင်းခံလိုက်ရတာ အကောင်းဆုံး ပြုံးနိုင်ဖို့အတွက် ကိုယ့်မျက်လုံးတွေသော့ခတ်ထားလိုက်တယ် ချိပ်ပိတ်ထားတဲ့ ဆန္ဒတွေက တစ်ခါတစ်ခါ ဒေါသချွန်းပွင့်သွားတဲ့အခါ မိုးမွှန်အောင် ဆဲဆိုမိလိုက်တယ် အရေပြားပေါ်ကျလာတဲ့ ရောဂါဆန်းတွေနဲ့ယဉ်ပါးအောင် ကြိုးစားရင်း နောက်ကျောက လှောင်ပြောင်လိုက်တဲ့ လက်ခုပ်သံတွေနဲ့ အသားကျသွားတယ် သေခြင်းတရားနဲ့ စစ်တုရင်ထိုးဖို့ ဘယ်သူကများ စိတ်ကူးခဲ့ဖူးလဲ သေရင်ကိုယ့်နောက်ပါဖို့ အကုသိုလ် တက်တူးတွေ ထိုးထားလိုက်တယ် ကြောင်တောင်ကန်းလမ်းတွေမှာ တပ်ထားတဲ့မျက်မှန်မည်းကြီး ခဏလောက်တော့ချွတ်ထား ထွေးထားတဲ့ စကားလုံးတွေကို ပြန်မျိုဖို့ သွားရည်တမြားမြား ကျနေတော့မှာလား နူးညံ့မှုတစ်ချို့က လောဘအလိုနောက်လိုက်မိသွားတဲ့ အခါ အာရုံခံအင်္ဂါအစိတ်အပိုင်းတွေက လောင်စာသက်သက်ဖြစ်ခဲ့ရ အစဆွဲထုတ်လိုက်တဲ့ ပိုးလိုးပက်လက်ရာဇဝင်တွေမှာ ကိုယ့်ကိုကိုယ် လေးစားဖို့ ဘာသိဒ္ဓိမှ တင်စရာမလိုဘူး ခေါက်သိမ်းထားတဲ့ ကိုယ်ကျင့်တရားတွေမှာ ကျိုးကျေရာတွေနဲ့
 လူဟာ လူလို ကျင့်/ကြံ/ခံစား လိုက်မှ သူ့ကိုယ်သူ လူလို့ထင်သွားရှာခဲ့ လူမျိုးကြီးဝါဒကို စနစ်တကျသုံးစွဲဖို့ အရောင်းမြှင့်တင်ရေးလုပ်ကွက်ကို ဘယ်မော်ဒယ်လ် ခပ်လန်းလန်းလေးနဲ့ ကြော်ငြာမလဲ ကာမေသုကို မိစ္ဆာလိုကျင့်ကြံတဲ့ လူကြီးလူကောင်းများခင်ဗျာ ကျနော်ကတော့ သူရာပြည်က ငမိုက်သား ကျော်ဦးပါ ခင်ဗျားတို့လူကြီးလူကောင်း ကျင့်ဝတ်တွေကို ဟားတိုက်ရင်း သိပ်လေးစားတဲ့ ကျော်ဦးပါ သွားလေရာ လိုက်ချင်တဲ့ တဇွတ်ထိုးစိတ်တွေကို ဓါတ်ဆီလောင်းထားလိုက်တယ် ကိုယ့်မှာ ခြစ်တိုင်းတောက်တဲ့ ကတုံးကတိုက် ဘာသာစကားတွေနဲ့ နာကြည်းစရာ ခေတ်ကြီးတစ်ခုလုံး ရှိတယ် တွေ့ရဲ့လား စက်သွားတစ်ခုမှာ အသွားတွေ တဖြောင်းဖြောင်းကျိုးကုန်ပြီ ချို့ယွင်းသွားတဲ့ Program မှာကစဥ့်ကလျားဖြစ်နေတဲ့ ကိုယ့်မှတ်ဥာဏ်တွေကို ထည့်သွင်းပေးပါ ဒါ Guns N Roses ရဲ့ Civil War မဟုတ်ဘူး ဘာသာပြန်စရာမလိုဘူး ဝါကျတစ်ကြောင်းရဲ့ အထူးပြုလုပ်ချက်တွေနဲ့ဘာသာဗေဒထဲကို သွပ်သွင်းပေးပါ သူတို့သုံးစွဲတဲ့ နိုင်ငံခြားဖြစ် ဆက်ဆံရေးတွေထဲမှာ  ကိုယ်ရေးတဲ့ကဗျာကတော့ Made In Myanmar စစ်စစ်ဖြစ်ကြောင်းပေါ့..။

ကျော်ဦး (လှိုင်)

အွန်လိုင်း လူငယ် ကဗျာ စကားဝိုင်း အမေးအဖြေ (ကဗျာဆရာ ကိုအောင်ရင်ငြိမ်း အမေး)

အမေး ၁။ အောင်ချိမ့်အစ မိုဃ်းဇော် အဆုံး ပင်မရေစီး ခေတ်ပေါ်ကဗျာခေတ်တုန်းက အနုပညာသြဇာနဲ့ ၀ါသမ္ဘာ တည်ဆောက်နိုင်ခဲ့ကြတဲ့ ၀ါရင့်ကဗျာဆရာ အများစု အနေနဲ့ ခေတ်နဲ့အညီ ကဗျာရေးဟန်အသစ်တွေဆက် မဖန်တီးနိုင်တော့ဘဲခေတ်ပေါ်ကဗျာအဟောင်းထဲမှာပဲ ရပ်တန့်ကျန်နေခဲ့ကြပြီလို့ ကိုယ် ထင်တယ်။ အာရုံခံစားပုံ လတ်ဆတ်ပြီး လူငယ်ဆန်တဲ့ နေမျိုး၊ ပိုင်၊ မောင်ဆေးရိုး၊ မင်းဆွေနှစ်၊ နိုင်မွန်အောင်သွင်၊ ခရမ်းပြာထက်လူ၊ခိုင်မြဲကျော်စွာ၊ မောင်ဖီလာ၊ ကိုရွေး သူတို့ကတော့ ခြွင်းချက်ပေါ့လေ။ ကဲ ညီလေးတို့ အမြင်ကို ပြောပါဦး။

အဖြေ ၁။ခေတ်ပေါ်ကဗျာရဲ့ရေစီးမှာ ရေးဟန်ပြောင်းလဲလာတဲ့ ကဗျာရဲ့အပြောင်းအလဲတွေကို လက်ခံနားလည်ပေးတဲ့  ဆရာတွေလည်း ရှိတယ်လို့ ကျွန်တော်ထင်ပါတယ်။ အွန်လိုင်းကဗျာတွေမှာလူငယ်တွေကို အားပေးထားတဲ့ ကွန်မန့်တွေလည်း တွေ့နေရတာတွေက လူငယ်တွေအတွက်အားတက်စရာပါ အစ်ကို။

အမေး ၂။ ညီလေးတို့က ၂၀၁၀ အလွန်မှာ ထွက်ပေါ်လာတဲ့ နောက်ဆုံး မျိုးဆက်သစ် လူငယ်ကဗျာဆရာတွေပေ့ါ။ ခေတ်ပြိုင်မြန်မာကဗျာရဲ့ အနာဂတ်အလားအလာက ညီလေးတို့ ရဲ့ အနုပညာ ဖန်တီးမှုအပေါ်မှာ မူတည်နေပြီ။ ခေတ်ပြိုင်မြန်မာကဗျာယဉ်ကျေးမှု အသစ်ဟာလည်း ညီလေးတို့ လက်ထဲ ရောက်နေပြီလို့ ကိုယ် ယူဆတယ်။ ဒါပေမဲ့ လူငယ်ကဗျာဆရာတွေနဲ့ လူမှုရေးနဲ့ အနုပညာ ထိတွေ့ဆက်ဆံမှု သိပ်မရှိတဲ့ ၀ါရင့်ကဗျာဆရာတွေက နောက်ဆုံး မျိုးဆက်သစ် လူငယ်တွေ ပေါ်ထွက်နေပြီဆိုတာ သတိမထားမိကြသေးဘူး။ တချို့ ကဗျာဆရာတွေအယ်ဒီတာတွေကျတော့လည်း သတိထားမိပေမဲ့ လူငယ်တွေကို အသိအမှတ်ပြု တန်ဖိုးထား နေရာပေးဖို့ ၀န်လေးတွန့်ဆုတ်နေကြသေးတယ်။ သူတို့ကို ဘာပြောချင်လဲ။

အဖြေ ၂။လူ့ပတ်ဝန်းကျင်မှာလည်း လူငယ်တွေကို သတိထားမိပေမယ့် နေရာမပေးတဲ့ လူကြီးတစ်ချို့လည်းကျွန်တော်တို့တွေ တွေ့နေကြရတာပဲ အစ်ကိုရာ အခုဆို လူငယ်ကဗျာဆရာတွေအများကြီးထွက်လာပြီ။ ခေတ်ရဲ့ရေစီးကြောင်းကို မြင်ရဲ့သားနဲ့ လက်မခံနိုင်ဘူးဆိုရင်တော့လူငယ်တွေအတွက်က ကိုယ်ယုံကြည်တဲ့ အနုပညာကို ဆက်ပြီးဖန်တီးယုံပေါ့။

အမေး ၃။ လက်ရှိ အခြေအနေအရ ၂၀၁၀ အလွန် ခေတ်ပြိုင်မြန်မာကဗျာ အခင်းအကျင်းမှာ ပင်မရေစီးခေတ်ပေါ်ကဗျာအပြင် အယ်လ်ပီ ၊ နီယိုမော်ဒန်၊ ကွန်ဆက်ခြူရယ်၊ စမ်းသပ်၊ စကားပြေကဗျာ၊ ဖလာ့ဖ် စသဖြင့် ကဗျာအမျိုးအစားသစ်တွေ အယူအဆတွေ အမျိုးမျိုး ရှိနေကြတယ်။ အဲဒီ ကဗျာအယူအဆ/ အနုပညာ လက်ရာတွေအပေါ် ညီလေးတို့ရဲ့ အမြင်။

အဖြေ ၃။ ကော်ဖီကြိုက်တဲ့လူကော်ဖီ လက်ဘက်ရည်ကြိုက်တဲ့လူ လက်ဘက်ရည်ပေါ့ အစ်ကို။ ဘာပဲသောက်သောက်ဆန္ဒပြည့်သွားဖို့ပဲ အဓိကလို့ ထင်ပါတယ်။ အားထုတ်ထားတဲ့ ကဗျာတွေ အများကြီး ကျွန်တော်တို့ဖတ်နေရပါတယ်။

အမေး ၄။ အဲဒီ ခေတ်ပြိုင်ကဗျာတွေထဲက ညီလေးတို့ အာရုံတိမ်းညွတ်မှု ရှိတဲ့ ကဗျာအမျိုးအစား။ အဲဒီ ကဗျာဗေဒအပေါ် နားလည်ခံယူထားပုံ အနှစ်ချုပ်။ တကယ်လို့ ညီလေးတို့ လက်ရှိရေးနေတဲ့ ကဗျာအနုပညာလက်ရာ တွေကို ဖန်တီးသူကိုယ်တိုင် အမှတ်တံဆိပ်တစ်ခုခု ခွဲခြားပြောပြပါ။ ကိုယ့် အနုပညာကိုယ် တခြားသူတွေနဲ့ ကွဲပြားခြားနားအောင် ပြောပါလို့ မေးရင် ဘယ်လိုဖြေကြမလဲ။ တချို့ ကဗျာဆရာတွေ/ ကဗျာဖတ်သူတွေကတော့ ကဗျာအနုပညာကို အမည်အမှတ်တံဆိပ်တွေ တပ်တာအပေါ်ယံ ကိစ္စတွေပဲလို့ ယူဆပြီး နှစ်သက်လက်ခံမှု မရှိကြဘူး။ ကိုယ့် အမြင်ပြောရရင် ကဗျာကိုယ်တိုင်ကိုကတခြား အနုပညာ အမျိုးအစားတွေနဲ့ ကွဲပြားခြားနားနေတဲ့ စာပေပုံသဏ္ဍာန်တစ်မျိုးပဲလေ။ အဲဒါကြောင့် မေးတာပါ။

အဖြေ ၄။ ကဗျာကိုတော့ဘယ်လိုကဗျာမျိုးဖြစ်ဖြစ် ဖတ်ပါတယ်။ သွယ်ဝိုက်မှုတွေ သိပ်မပါပဲထိထိရောက်ရောက်ရေးနိုင်မယ့် ကဗျာအရေးအသားမျိုးတွေကို ပိုသဘောကျတယ်။ ကျွန်တော်ရေးတဲ့ ကဗျာကို အမျိုးအစားသတ်မှတ်ဖို့ကတော့ ဖတ်သူတွေကိုယ်တိုင်ပဲတံဆိပ်ကပ်ပါစေ။ ဘယ်လိုတံဆိပ်ကပ်ကပ် ကျွန်တော်တို့ရေးနေတာ ခေတ်နဲ့လူမှုအမြင်ကို ထိထိရောက်ရောက် ဖွင့်ထုတ်ပြလိုက်တဲ့ ခေတ်ပြိုင်ကဗျာတွေလို့ပဲ သတ်မှတ်ပါတယ်။ ကိုယ်ရေးတဲ့ကဗျာကို ကိုယ်ကြည်ညိုရင် ကျေနပ်စရာလို့ထင်ပါတယ်။

အမေး ၅။ ညီလေးတို့ အနေနဲ့ ကဗျာအနုပညာ လက်ရာတစ်ခုကို ဘယ်လို အတွေးအခေါ် ဘယ်လို အာရုံခံစားပုံ ဘယ်လို အတတ်ပညာပိုင်း နည်းစနစ်ပိုင်းတွေနဲ့ ရေးသားဖန်တီးနေကြသလဲ။ ကဗျာရေးသားခြင်းရဲ့ နောက်ကွယ်မှာ ဘယ်လို နောက်ခံ အယူအဆနဲ့ ခံယူ ယုံကြည်ချက်တွေ ရှိနေကြသလဲ။

အဖြေ ၅။ကျွန်တော်ရေးလိုက်သမျှကတော့ စိတ်ခံစားမှုပေါ်ထင်ဟပ်လာတဲ့ အကြောင်းအရာတွေကိုချရေးပစ်တာများပါတယ်။ အဲဒီကမှ ကဗျာတည်ဆောက်ပုံကို အရိုးရှင်းဆုံး တင်ပြနိုင်မယ့်ဘာသာစကားမျိုးတွေ သုံးဖြစ်ပါတယ်။ လူ့ပတ်ဝန်းကျင်ကို ထင်ဟပ်ပြနိုင်ဖို့ကျွန်တော်တို့ ကဗျာတွေ ရေးနေရအုံးမှာပါပဲ။


အမေး ၆။ မြန်မာနိုင်ငံက ကွန်ဆက်ခြူရယ်၊ အယ်လ်ပီ စသဖြင့်နဲ့ ပို့စ်မော်ဒန် ပထမမျိုးဆက် စာပေအယူအဆတွေကို လက်ခံယုံကြည်တဲ့ ကဗျာဆရာတွေမှာ ကဗျာဆရာရဲ့ တစ်သီးပုဂ္ဂလအာရုံခံစားမှုကို အဓိကမထားတဲ့၊ ခေတ်စနစ်လူမှုဝန်းကျင်ရဲ့ အကြောင်းအရာ အဖြစ်အပျက်တွေကို မျက်ကွယ်ပြုချင်တဲ့ အယူအဆမျိုးတွေ ရှိနေကြတယ်။ တကယ်တော့ အဲဒီ အယူအဆတွေက ၁၉ ရာစုအလယ်ပိုင်းလောက်က ပြင်သစ်နဲ့ အင်္ဂလန်နိုင်ငံတွေမှာ ခေတ်စားခဲ့တဲ့ Aestheticism ရဲ့ စာပေအနုပညာ အယူအဆတွေ။ Oscar Wilde တို့လို ကိုယ်တို့ဆီမှာဆိုရင် ဆရာသစာနီတို့လိုပေ့ါ အနုပညာရသအဓိက၀ါဒီတွေက သန့်စင်တဲ့ အနုပညာဟာလူမှုရေး၊ နိုင်ငံရေး၊ ကိုယ်ကျင့်တရားဆိုင်ရာ ဆုံးမသွန်သင်မှုတွေနဲ့ မရောထွေးသင့်ဘူးလို့ ယူဆခဲ့ကြတယ်။ အနုပညာဟာ အနုပညာအတွက်ဆိုတဲ့ ကြေညာချက်က Aestheticism ရဲ့ အနှစ်ချုပ် အယူအဆပေ့ါ။ ညီလေးတို့ အမြင်ကရော...ကဗျာအနုပညာမှာ ကဗျာဆရာရဲ့ တစ်သီးပုဂ္ဂလ အာရုံခံစားမှုနဲ့ခေတ်စနစ်လူမှုဝန်းကျင်အပေါ် အမြင်တွေ ပါသင့် မပါသင့်။


အဖြေ ၆။ ကဗျာဆရာရဲ့တစ်သီးပုဂ္ဂလ အာရုံခံစားမှုနဲ့ ခေတ်စနစ်လူမှုဝန်းကျင်အပေါ် အမြင်တွေ ပါသင့်တယ်လို့ကျွန်တော်မြင်ပါတယ်။ ဒီနေ့ခေတ်ရဲ့ နာကျင်မှုတွေကို ကျွန်တော်တို့လည်းခံစားနေကြရတာပဲ။

အမေး ၇။ ကိုယ့် အမြင်ပြောရရင် မြန်မာစာပေလောကမှာ Realism အယူအဆနဲ့ တန်ဖိုးစံနှုန်းတွေကို စွဲလမ်းဆုပ်ကိုင်ထားတဲ့ အယ်ဒီတာတွေနဲ့ စာရေးဆရာတွေ ရှိနေလို့ မြန်မာဝတ္ထုတို/ အက်ဆေး အရေးအသားတွေဟာ Realism နယ်ပယ်ထဲမှာပဲ ပိတ်မိနေကြပြီး မြန်မာစကားပြေယဉ်ကျေးမှု အသစ်ဖွံဖြိုးတိုးတက်မှု မရှိဘဲ နှစ်ပေါင်းများစွာ ရပ်တန့်နေတာလို့ မြင်မိတယ်။ ၁၉၉၅ ၀န်းကျင်ကနေ ၂၀၀၅ လောက်အထိ ခေတ်စားရှင်သန်ခဲ့တဲ့ မော်ဒန်နဲ့ ပို့စ်မော်ဒန် စကားပြေတွေကတော့ ခြါင်းချက်ပေါ့လေ။ ကဗျာအနုပညာမှာ ဆိုရင်လည်း Modern Conservative ဖြစ်နေတဲ့ ၀ါရင့် ၀ါနုကဗျာဆရာတွေ၊ အယ်ဒီတာတွေ ကဗျာဖတ် ပရိသတ်တွေ ရှိနေကြသေးတယ် ထင်တယ်။ အဲဒီလို Modern Conservative တွေကို မြန်မာကဗျာယဉ်ကျေးမှု ဖွံ့ဖြိုးတိုးတက်ရေးကို မလိုလားတဲ့သူတွေ၊ အနှောင့် အယှက် အဟန့်အတား ဖြစ်စေမယ့် သူတွေလို့ဆိုနိုင်မလား။

အဖြေ ၇။ အဟန့်အတားလို့တော့ကျွန်တော်မမြင်ပါဘူး။ အားလုံးဟာ ကိုယ့်ယုံကြည်ချက်နဲ့ကိုယ်ပဲ ကဗျာယဉ်ကျေးမှုဟာခေတ်ရဲ့အလိုအရ ပြောင်းလဲတိုးတက်လာတာကို ဘာနဲ့မှ တားလို့မရနိုင်ဘူး ထင်ပါတယ် အစ်ကို။

အမေး ၈။ အွန်လိုင်း ကဗျာယဉ်ကျေးမှုဘက် တစ်ချက်လောက် လှည့်ကြည့်လိုက်ရအောင်။ အွန်လိုင်းက ကဗျာဆရာတွေနဲ့ ကဗျာတွေအပေါ် ညီလေးတို့ အမြင်ကို အုပ်စုနဲ့ အမျိုးအစားတွေ ခွဲခြားဝေဖန်ပေးပါ။ အွန်လိုင်းနဲ့ ပရင့်တ်မီဒီယာ ပဋိပက္ခ ကိစ္စ၊ အနုပညာဗီဇနဲ့ ကဗျာဖန်တီးမှု အတွေ့အကြုံ အနုအရင့်ကိစ္စ၊ အယ်ဒီတာ မရှိတဲ့ မီဒီယာဖြစ်တဲ့အတွက် ကိုယ့်ကဗျာကိုယ် လွတ်လွတ်လပ်လပ် ရေးလို့ရနေတဲ့ အခွင့်အလမ်းရဲ့ နောက်ဆက်တွဲ ကောင်းကျိုး ဆိုးကျိုး၊ အနုပညာ အဆင့်အတန်း သိပ်မရှိတဲ့ ကဗျာတွေအောက်က Like & Comment ကိစ္စတွေက အစပေ့ါ။

အဖြေ ၈။ အွန်လိုင်းကဗျာတွေမှာကဗျာကိုတစိုက်မတ်မတ်ရေးနေတဲ့ လူငယ်/လူကြီး ကဗျာဆရာတွေ ရှိပါတယ်။ အဲဒီလူတွေတော်တော်များများကလည်း အခုဆို စာမျက်နှာတွေပေါ်မှာ တွေ့နေရပါပြီ။ အွန်လိုင်းနဲ့ပရင့် ကိစ္စတွေကလည်း အေးအေးဆေးဆေး ဖြစ်သွားကြတယ်။ အနုပညာဗီဇနဲ့ ကဗျာဖန်တီးမှု အတွေ့အကြုံကတော့ကျွန်တော်လည်း ဖတ်တုန်း လေ့လာတုန်းပဲ ရှိပါသေးတယ်။ ကဗျာတွေလိုင်းပေါ်မှာလွပ်လွပ်လပ်လပ်ရေးလို့ရတဲ့ကောင်းကျိုးက ကဗျာအကောင်းစားတွေကိုအွန်လိုင်းပေါ်မှာတွေ့နေရတာပါပဲ။ ဆိုးကျိုးကတော့ အစ်ကိုပြောသလို  အနုပညာချို့တဲ့နေတဲ့ ကဗျာတွေနဲ့ ပုဂ္ဂိုလ်ရေးLike & comment ယဉ်ကျေးမှုတွေ ထွန်းကားလာတာပါပဲ..။ ဒီထက်ပိုဆိုးတာကနာမည်ရပြီးသား ကလောင်နာမည်တွေကို စာလုံးပေါင်းလေးလွဲရုံလောက်ပေးပြီး နာမည်ယူနေတဲ့အတုတွေ ပေါ်လာတာ အဆိုးဆုံးပဲ အစ်ကိုရာ။


အမေး ၉။ မြန်မာကဗျာလောကမှာ ကဗျာချဉ်းကပ်ခံစား ဝေဖန်မှု လုပ်ကြတဲ့အခါ တန်ဖိုးထား နားလည်ခံစားမှု( Appreciation ) နဲ့ ကောင်းဆိုး ဝေဖန် ချဉ်းကပ်သုံးသပ်( Criticize ) လုပ်တာ ဆိုပြီး နှစ်မျိုးနှစ်စားလုံး လုပ်ဆောင်ကြတာ တွေ့ရတယ်။ ဆရာမြဇင်၊ ဆရာ မင်းလှညွန့်ကြူး၊ ဆရာမျုိုးသန့်၊ ကိုမင်းခက်ရဲ၊ သူရနီတို့ရဲ့ ကဗျာချဉ်းကပ်မှုတွေက Criticize ဘက်ကို အလေးသာပြီး ဆရာမောင်သာချိုနဲ့ ကို အောင်ခင်မြင့်တို့က Appreciation ဘက်ကို အလေးသာတယ်လို့ ကိုယ် မြင်တယ်။ မြန်မာကဗျာဝေဖန်ရေးအပေါ် ညီလေးတို့ရဲ့ အမြင်။ ပြီးတော့ အခု နှစ်ပိုင်း အွန်လိုင်းမှာ သဘောထားအမြင်မျုိုးစုံနဲ့ လူပြောသူပြောများနေတဲ့ မောင်ဂျိုကာရဲ့ ကဗျာချဉ်းကပ်မှုတွေနဲ့ လူမှုရေး ဝေဖန်ချက်တွေအပေါ် အမြင်။

အဖြေ ၉။ ကဗျာချဉ်းကပ်တွေကတော့လေးလေးစားစားနဲ့အားပေးရမှာပါ။ ချစ်လို့ရိုက်တာ ကောင်းစေချင်လို့ရိုက်တာမျိုးတွေပေါ့အစ်ကို။ ကြည့်မရလို့ရိုက်တာဆိုရင်တော့ ဘာမှလေးစားစရာ မရှိတဲ့လုပ်ရပ်ပါပဲ။

အမေး ၁၀။ ၂၀၁၀ အလွန် ခေတ်ပြိုင်မြန်မာကဗျာ အခင်းအကျင်းမှာ ခေတ်ပေါ်ကဗျာ၊ အယ်လ်ပီ၊ ကွန်ဆက်ခြူရယ်၊ စမ်းသပ်၊ ဖလာ့ဖ်၊ စကားပြေကဗျာ စသဖြင့် ကဗျာအယူအဆ/ အမျိုးအစားတွေ ရှိနေကြတယ်။ ခေတ်ပြိုင်ကဗျာ( Contemporary Poetry) ဆိုတဲ့ ဝေါဟာရအပေါ်မှာလည်း အမြင်နဲ့ ၀ိဝါဒ အမျိုးမျုိုး ကွဲပြားနေကြတယ်လို့ ထင်တယ်။ ကိုဇော်ဇော်ထွန်းကတော့ ခေတ်ပြိုင်ကဗျာလို့ မြန်မာလို မပြောဘဲ Contemporary Poetry လို့ အင်္ဂလိပ်လို တိုက်ရိုက် သုံးနှုန်းပြောဆိုဖို့ အကြံပေးထားတယ်။ ခေတ်ပြိုင်ကဗျာဆိုတာ တချိုကဗျာဆရာတွေ ယူဆနေသလို ကဗျာအမျိုးအစားသစ် တစ်ခုလား။ ဒါမှမဟုတ် ၂၀၁၀ အလွန် မြန်မာနိုင်ငံမှာ အသစ်ဖြစ်ထွန်းလာတဲ့ ကဗျာအမျုိုးအစားသစ်တွေကို ခြုံငုံခေါ်ဝေါ်တဲ့ ပညာရပ်ဆိုင်ရာ ဝေါဟာရတစ်ခုလား။ ညီလေးတို့ ဘယ်လို ခွဲခြားနားလည်ထားလဲ။ ညီလေးတို့ အမြင်နဲ့ဆိုရင် ခေတ်ပေါ်ကဗျာကိုရော ၂၀၁၀ အလွန် ခေတ်ပြိုင်ကဗျာစာရင်းထဲ ထည့်မလား။ ချန်ထားခဲ့ချင်လား။ ပြီးတော့ လာမယ့် ဆယ်စုနှစ်တစ်ခု အတွင်း ခေတ်ပြိုင်မြန်မာကဗျာရဲ့ အလားအလာ။ ဘယ်လို ကဗျာအမျိုးအစားတွေ ဆက်လက် ရှင်သန်ရပ်တည် နေနိုင်မယ် ထင်လဲ။ ဘယ်လို ကဗျာ အမျုိုးအစားသစ်တွေ အသစ် ပေါ်ပေါက် ထွန်းကားလာမယ်လို့ ခန့်မှန်း ထင်ကြေးပေးမလဲ။

အဖြေ ၁၀။လက်ရှိစမ်းသပ်ကဗျာနဲ့ ရေးဟန်ပြောင်းလာတဲ့ ခေတ်ပေါ်ကဗျာတွေအားလုံးကိုခြုံငုံပြီးတော့ ခေတ်ပြိုင်အဖြစ်ခေါ်လို့ရမယ်လို့ ကျွန်တော်ထင်တယ်။ ခေတ်ပြိုင်ကဗျာကအခုဆို လူငယ်ကဗျာတွေ အများကြီး ရေးနေကြတဲ့ အမျိုးအစားအဖြစ် ထွန်းကားလာပါပြီ။ စစ်မှန်တဲ့ အနုပညာတွေ အောင်မြင်စွာ ကျန်ခဲ့မှာပါအစ်ကို။ ကဗျာက မပြီးဆုံးနိုင်တဲ့အနုပညာအဖြစ်နဲ့ ဖွံ့ဖြိုးတိုက်တက်နေမှာပဲ လို့ကျွန်တော် ယုံကြည်ပါတယ်။

ကျော်ဦး(လှိုင်)

စီးကရက်တစ်လိပ်စာ အော်ညဉ်းမိခြင်း

ဘယ်လို အကုသိုလ်မျိုးလဲ ဝေးကွာခြင်းထဲကို မိုင်တိုင်တွေ ထိုးထည့်ထားတယ်။ အစစ အရာရာမှာ ကိုယ်က ကိုယ့်လက် ကိုယ့်ခြေနဲ့ မှောက်မှားတတ်တဲ့ကောင်။ ကိုယ့်ကိုကိုယ် ပြန်ရှိခိုးဖို့ မေ့နေတတ်သေးတယ်။ အစွန်းတစ်ဖက်ကျတဲ့ စိတ်တွေနဲ့ လူဆန်ဆန် တစိမ့်စိမ့် ရူးသွပ်မိပါတယ်။ ခွက်အလွတ်ထဲ ကိုယ့်ကိုကိုယ်လောင်းထည့် ပူဆင်းသွားအောင် မျိုချပစ်လိုက်တယ်။ ကံ၊စိတ်၊ဥတု၊အာဟာရ တဖြည်းဖြည်း ချို့ယွင်းလာပြီ။ အသုံးမကျတဲ့ စွဲလန်းမှုတွေက ကိုယ့်လည်ပင်းမှာ ကန့်လန့်ဖြတ်စိုက်ဝင်နေတဲ့ သံတစ်ချောင်းလို နင်နေတုန်းပဲ။ ဘယ်လိုနည်းလမ်းမျိုးနဲ့ စိတ်ခံစားမှုကို သစ္စာဖောက်ပစ်လိုက်ရမလဲ။ ကိုယ့်သွေးသားတွေကို တစ်လွှာချင်း တစ်စိပ်ချင်း ခွာချပစ်လိုက်ရမလား။ ကိုယ့်လည်ပင်း ကိုယ်ကြိုးကွင်းပြန်စွပ်ပစ်လိုက်ရမလား။ နာကျင်နေတဲ့ သားရဲတစ်ကောင်နဲ့အော်သံမျိုးနဲ့ ကုတ်ခြစ်အော်ပစ်လိုက်တယ်။

ကိုယ့်အခန်းက မှန်ချပ်တွေကွဲ ကိုယ့်အသားစတွေကို အစိပ်စိပ်အမွှာမွှာ ထိုးစိုက်လိုက်သလို ခံစားမှု။ တစ်ယောက်တည်း ခြောက်ခြားလာတဲ့အခါ အမေဆိုတဲ့ စကားလုံးတော့ ကိုယ်ရေရွတ်မိတယ်။ လူတွေရဲ့ ပါးစပ်သေနတ်တွေက ကိုယ့်နားထင်ကို တေ့ဖြုတ်လိုက်ကြတယ်။ ဒီလူတွေကို ဘယ်လိုဘာသာစကားနဲ့ ကျိန်ဆဲမိခဲ့မှန်း ကိုယ်မသိဘူး။ သွေးကြောတွေ တဆတ်ဆတ်ခုန်ထ။ ကိုယ့်နှလုံးသားကတော့ တစ်စုံတစ်ယောက်ကို အလံဖြူပြထားခဲ့။ ကိုယ့်ချဉ်ဆီထဲမှာ အလဲအထပ်မပါတဲ့ မေတ္တာတရားကို ယင်းကိုက်နေသလို တဆစ်ဆစ်တောင့်တ။ စိတ်ကူးနဲ့ဆွဲထားတဲ့ လုံခြုံတဲ့ အသိုက်အမြုံဟာ ကိုယ်ငယ်ငယ်ထဲက ပျောက်ကွယ်သွားတယ်။ ကိုယ့်ကိုကိုယ်တောင် မယုံရဲတော့တာ ကိုယ့်မှာ အပြစ်ရှိလား။

တစ်ကိုယ်ရေ နာကျင်မှုတွေကို ဖောက်ခွဲပစ်ထုတ်လိုက်တယ်။ ကိုယ်ဟာ ဝံပုလွေတစ်ပိုင်း လူတစ်ပိုင်း။ ကောက်ကျစ်မှုနဲ့ လူသားဆန်ဆန် နေတတ်တဲ့ကောင်။ ကိုယ်ရေးပြီး ကိုယ်တိုင်မကြိုက်လို့ ဆွဲဖြဲပစ်လိုက်တဲ့ ကဗျာတစ်ပုဒ်လိုကောင်ပါ။ သစ္စာတရားနဲ့ ခပ်ကင်းကင်းနေတတ်လာပြီ။ နှစ်ဆယ့်တစ်ရာစုထဲမှာ လိုသလောက်နေလိုက်ရုံပဲ။ လူဖြစ်ရှုံးနေရတာ အသက်တစ်ရာလည်း မနေချင်ဘူး အမှုတစ်ရာလည်း မတွေ့ပါရစေနဲ့။ သွေးနဲ့ကိုယ် သားနဲ့ကိုယ်တွေပဲ။ ချစ်တတ်တယ် မုန်းတတ်တယ် အဆိုးဆုံးကတော့ သိပ်ဝမ်းနည်းတတ်တယ်။ ချစ်ခြင်းမေတ္တာကို တရှိုက်မက်မက် ရှူရှိက်ချင်စိတ်တွေရှိတယ်။ လူကိုလူချင်း လှည့်ပတ်ခြင်း ဘယ်တော့များမှ ကင်းရှင်းမှာလဲ ကိုယ်သေရင် ကိုယ့်မျိုးဆက်က ဒီဆုကို ထပ်တောင်းကြအုံးပေါ့။ နံရံကို ပစ်ခွဲနေတဲ့ ကိုယ့်နှလုံးသားက နတ်ဆိုးတစ်ကောင် ဖြစ်ညှစ်ထားသလို နာနာကျင်ကျင် ကြေကွဲနေရတုန်းပဲ။ ဒီအခန်းမှာ ကိုယ့်ကြေကွဲစိတ်တွေ ပြည့်နေတယ်။

နေရတဲ့ စနစ်ထဲမှာ ကိုယ်တို့တွေ ရန်ဖြစ်မနေနဲ့တော့။ ဘယ်သူမှ ဘာကောင်မှမဟုတ်။ တစ်ယောက်မျက်နှာ တစ်ယောက်ကြည့်ပြီးနေရတဲ့ လောကကြီးမှာ အာဏာရှင်တွေကို ဘယ်သူကဖန်ဆင်းလိုက်တာလဲ။ စာနာစိတ် ငတ်သေရတဲ့ လူတွေ ကမ္ဘာကြီးမှာ များလာတယ်။ ကိုယ့်အဖြစ်ကိုယ် ငိုကြွေးနေရုံကလွဲလို့ ဘာများတတ်နိုင်မလဲ။ ဒုက္ခသမုဒ္ဒရာထဲ စီးနင်းလိုက်ပါလာကြသူတွေ သုခဆိပ်ကမ်းက ဘယ်နေရာလဲ။ ကိုယ့်သွေးအမျိုးအစားတောင် ကိုယ်မေ့တတ်နေပြီ။ ပြည်တန်ဆာလား ပြည့်တန်ဆာလား အေး.. ရှင်းရှင်းလင်းလင်းခေါ်ရရင်တော့ ဖာ။ အရှက်တရားက စားဝတ်နေရေးလောက် အရေးကြီးပါတော့မလား။ ကလေးမတစ်ယောက် ပြောတဲ့စကားလို ကုန်ဈေးနှုန်းက ငယ်ထိပ်ကို တဒိုင်းဒိုင်း ပစ်နေတဲ့ သေနတ်တစ်လက်ပဲ။ ကိုယ်ချင်းစာတရားကို ခင်ဗျားတို့ ဘဏ်တိုက်ထဲက ငွေတွေလို ပေါပေါလောလော ထုတ်သုံးပေးလိုက်ပါ။ အခုတော့ ဘယ်လို မြှောက်ပေးရမှန်းမသိ ပပျောက်ရေးလည်းမဟုတ် ကူညီရေးလည်းမဟုတ် စာနာရေးလည်းမဟုတ်  မသာလောင်းအချင်းချင်း နောက်ဘဝထဲ ပါသလောက် ယူသွားကြပေါ့လေ.။

ကျော်ဦး(လှိုင်)

သူ့ Mobile phone လေးက.... ကိုယ်ဆက်ရင် ဒီလိုပြန်ပြောတယ်

ဘယ်လိုပုံစံမျိုး ကြွေကျပေးရမလဲ ဟန်နီ..
ကိုယ့်စိတ်ကူးဟာ တစ်ခါတစ်ခါ ရူးပြီးလွတ်ထွက်သွားတယ်
မင်းရဲ့မွှေးညှင်းနုနုလေးတွေနဲ့ အဝါရောင်လက်မောင်းသားပေါ်မှာ မင်းပါးပြင်ကိုကြည့်ရင်း ကိုယ့်စိတ်နဲ့ကိုယ် တစ်နေ့တစ်ကြိမ် ပြစ်မှားခွင့်ပြုပါ  မင်းမျက်ဝန်းထဲက အရောင်မှာ ကိုယ်ဟာ တလက်လက်တောက်ပချင်တယ် ကိုယ့်အချစ်စိတ်ဟာ ရွဲရွဲစိုနေတဲ့ ရေစိုအဝတ်တစ်ထည်ပဲ ကံသုံးပါးနဲ့ မောဟိုက်မိတိုင်း မင်းနာမည်လေးပဲ အပန်းဖြေရွတ်နေခဲ့ရတဲ့ကောင်ပေါ့ မင်းရဲ့ Mobile phone လေးဧရိယာပြင်ပရောက်နေတယ်ဟန်နီ

ဒီလိုပါဟန်နီ တစ်ယောက်နဲ့တစ်ယောက် သံသယမြူကြားမှာ ခပ်ဝါးဝါးတော့ မြင်နေပါရစေ ကိုယ့်ကဗျာထဲမှာ ချစ်ခြင်းမေတ္တာက ဘယ်ဘုရားသခင်မှ ဖန်ဆင်းထားတာမဟုတ်ဘူး မျှော်လင့်ချက်ကို လူသွားစင်္ကြန်ပေါ် ရွှေ့ထားရမှာလား ဒီအရသာကို ကိုယ့်အူလမ်းကြောင်း အဆုံးထိ မျိုချထားရမလား ပျော်ရွှင်မှုဟာ တဖြည်းဖြည်း အက်ကွဲလာတဲ့ မှန်တစ်ချပ်လိုပဲ ဟန်နီ မင်းဟာကိုယ့်အိပ်မက်ဖြူဖြူထဲက ထိတွေ့မရတဲ့ သိပ်လှတဲ့ တစ္ဆေမလေးပဲ ကိုယ့်စိတ်ကိုယ်ပြန်ရှမိတဲ့ ဓါးတစ်ချောင်းလို သတိရမိလိုက်တိုင်း ရင်ဘတ်မှာ အက်ကွဲရာတွေတစ်ပုံတစ်ပင် ရင်ကွဲနာလား ရှင်ကွဲနာလား တဆစ်ဆစ်နဲ့နာနေရတဲ့ သတိတရဝေးကွာခြင်းပါပဲ ဟန်နီ သံယောဇဉ်တွေ မတ်တပ်ထထရပ်တဲ့အခါ ဘယ်ကရောက်လာမှန်းမသိတဲ့ အလွမ်းတွေနဲ့ လွမ်းတတ်နေခဲ့ပေါ့ မင်းရဲ့လက်သူကြွယ်မှာ ကိုယ့်အလွမ်းတွေနဲ့ မင်းကို စေ့စပ်ထားချင်ပါတယ်ဟန်နီ မင်းရဲ့ Mobile phone ကကိုယ့်ကို မအားသေးဘူးလို့ပြောတယ် ဟန်နီရယ်

နှလုံးသားနဲ့ဦးနှောက်က ချစ်ခြင်းတရားနဲ့တွက်ရင် အန္တရယ်အရှိဆုံး အကွာအဝေးပဲ အမှောင်ဆန်တဲ့ ပျင်းစရာယဉ်ကျေးမှုတွေ အဟုတ်ကြီးမှတ်နေတဲ့ ဦးနှောက်ပျက် အချစ်ဒဿနတွေ ဒီလောကမှာ ကျဆုံးပါစေ ဒီလူတွေကိုထားခဲ့လိုက် မင်းဟာ ကိုယ့်ရဲ့လူ့အဖွဲ့အစည်းပါ ဖျက်မရတဲ့ ကိုယ့်သွေးပြန်ကြောထဲက တက်တူးပါဟန်နီ မကျက်သေးတဲ့ ဒဏ်ရာတွေနဲ့ကိုယ်က ကဗျာအနုပညာမှာ စွဲစွဲလမ်းလမ်း မှောက်မှားခဲ့ပေါ့ မင်းက ကိုယ်စွဲလမ်းနှစ်ခြိုက်မိတဲ့ ဝါကျတစ်ကြောင်းပေါ့ ကိုယ့်နှလုံးသားက အစာမစားပဲ ဆေးမှားသောက်မိသူလို တုန်တုန်ရင်ရင် မင်းရဲ့လက်သည်းလေးတွေမှာ ကိုယ်က ရူးသွပ်မိပါတယ် မင်းနဲ့ကိုယ် ကိုယ်ချင်းစာတရားကိုယ်စီနဲ့ လူသားပီပီ တစ်လောကလုံးကို ချစ်ပြလိုက်ချင်တယ် မင်းရဲ့ Mobile phone လေး စက်ပိတ်ထားတယ်တဲ့ ဟန်နီ

တစ်ခုခုဆို ကိုယ့်ကိုအပြစ်မတင်လိုက်ပါနဲ့ သွေးဆုံးနေတဲ့ ဆက်သွယ်ရေးစနစ်ထဲမှာ မင်းနဲ့ကိုယ်က ဘယ်လိုဝဋ်ကြွေးများပါလာသလဲ မင်းဟာ ကိုယ့်သမုဒယဇာတ်လမ်းထဲက မင်းသမီးပေါ့ ဟန်နီ တစ်စက်ချင်းကျနေတဲ့ လရဲ့အေးချမ်းမှုအရောင်ပဲ မင်းပဲ ပြောကြည့်ဟန်နီ ယောက်ျားတစ်ယောက်ရဲ့ချစ်ခြင်းမေတ္တာက နှစ်ဖက်သွားဓါးလို ဘယ်ဘက်ဖြစ်ဖြစ် အစွန်းရောက်နိုင်တာပေါ့ လူု့အဖြစ်မှာ တန်ဖိုးအနည်းဆုံး အဖြတ်ခံရတဲ့ လေလံဈေးကွက်ဟာ ကိုယ်တို့လူငယ်ဘဝပါပဲ ဟန်နီ ဖြစ်နိုင်ချေတွေအများကြီးထဲ မင်းနဲ့ကိုယ်က.. မင်းဆုံးဖြတ်ချက်ပဲ ဟန်နီ ကိုယ်ဟာ ချစ်ခြင်းတရားထဲမှာ သဲကြိုးတော့ မပြတ်ပါရစေနဲ့ဟန်နီ မင်းစကားတစ်ခွန်းထဲနဲ့ လောကဓံကြီးကို ကိုယ်မောက်မာပြလိုက်ပါရစေကွာ.. မင်းရဲ့ Mobile phone လေး နံပါတ်ပြောင်းသွားပြီလား ဟန်နီ...။

ကျော်ဦး(လှိုင်)

ဒီနေ့ခေတ်လူငယ် အချဉ်မဟုတ်ဘူး အချိုသပ်လို့မရဘူး တော်ကီခေတ်ကြီး ဆုံးသွားရှာပြီ

အမှောင်ယောင် ဆိုးထားတဲ့ ညပျင်းပျင်းထဲ စုန်းတောက်လိုက်သလို ဖျတ်ခနဲ လက်ခနဲ စိမ်းသွားတယ် ဘာတွေလဲ ကျွန်မနားက အမှောင်ကားတွေပဲ အချိုဓါတ်မရှိတဲ့ နှုတ်ခမ်းတွေကို စုပ်ယူနမ်းရှိုက် စိတ်တူကိုယ်တူ ရူးသွပ်လိုက်ကြ မွန်းကြပ်မှုတွေကို ဓါတ်ပုံထဲက ချွေးတွေရွှဲနစ်နေတဲ့ ရင်သားပေါ်မှာ ပစ်ခွဲပစ်လိုက် ဘယ်ဘုရားရဲ့အလိုတော်အတိုင်းမှ မနေနိုင်တော့တဲ့ ခေတ်ကြီးထဲ အမှန်တရားနဲ့ မှောက်မှားမိတဲ့ မိန်းမတစ်ယောက် ရှင်တို့အညှီအဟောက်တွေ အစွယ်လာထုတ်မပြနဲ့ နားကားသွားမယ်

ဒေါသဆိုတာ မိန်းမတစ်ယောက်အတွက် ကာကွယ်ရေးပစ္စည်းလားကလေး ကိုယ်က မိန်းမတစ်ယောက်ရဲ့ ဓါတ်ပုံအောက်မှာ မင်းတို့ရဲ့ Face Book ယဉ်ကျေးမှုထုံးစံအတိုင်း အမည်မဲ့သူရဲကောင်းတွေလိုတော့ မဆဲတတ်ဘူး မင်းစိတ်ထဲမှာ ကိုယ်ဟာ ခပ်တုံးတုံးယောက်ျားတစ်ယောက် အသိတရားကိုနေ့တိုင်း Update လုပ်ထားတဲ့ကောင် မင်းဓါတ်ပုံအောက်က ကိုယ့် Comment ကို ရိုရိုသေသေ ဖတ်ကြည့်လိုက်ပေါ့ ကလေး 

ရှင် ဘာပြောလိုက်တယ်.....
အဲဒီပို့စ်က ကိုယ်ကြိုက်တဲ့ မင်းသမီးတစ်ယောက်ရဲ့ အရှင်လတ်လတ် မှောက်မှားမိစေတဲ့ နှုတ်ခမ်းပေါ့ ဟုတ်လား
ဘလိုင်းကြီး ဘီလူးဆိုင်းတီးပြီး ဝင်မလာနဲ့လေ အလှူအိမ်မဟုတ်ဘူး ရှင်တို့ရဲ့ မနောကံမြောက် ပြစ်မှားမှုလောက်ကို ကြောက်နေရင် ကျွန်မရဲ့ ပေါင်သားဖြူဖြူတွေကို ထုတ်မပြဘူး Sex မှာလက်ယဉ်နေတဲ့ ငကြောင်တွေနေတဲ့လောက လိင်မှုဆိုင်ရာ အကြမ်းဖက်ခံရတဲ့ အပျိုရည်တွေ ဘယ်လောက်များနေပြီလဲ စကတ်နဲ့ဘောင်းဘီအောက်က ပြက်လုံးတွေနဲ့ တဟားဟား တဟီးဟီး ရယ်နေတဲ့ လူတွေ ရှင်မို့လို့ နှလုံးအမောအဖောက်ခံနေတယ် သိပ်စဉ်းစားမနေနဲ့ တော်ကီ ခပ်မိုက်မိုက်တွေတက်လာရင် ရင်ခုန်ပြီး လင်တရူးတဲ့ ခေတ်မဟုတ်ဘူး

မင်းရဲ့ခွေကျနေတဲ့ ဆံနွယ်ကအစ ခြေအဆုံး ချစ်ခြင်းတရားတွေနဲ့ နှလုံးသားအလိုတော်ကျ ပြစ်မှားမိတာ သန့်စင်မှုတစ်ခုလို့ မင်းမြင်ကြည့်ပေးပါကလေး ချစ်ခြင်းမေတ္တာသက်သက်ဆိုတာ မင်းသိထားခဲ့တဲ့ ဂရိဒဏ္ဍာရီပဲ လူ့အဖြစ်ကို ကယောင်ကတမ်းရလာတဲ့သူတွေ ရမ္မက်နဲ့ကြီးပြင်းလာပြီးမှ ဟန်ဆောင်ကြ ဆိတ်ကွယ်ရာကျမှ လိင်ပိုင်းဆိုင်ရာ စိတ္တဇတွေကြောင့် လူ့အဖွဲ့အစည်းမှာ လူမဆန်တဲ့ လူကြီးလူကောင်းတွေများလာခဲ့ပေါ့ ထားခဲ့လိုက်ပါ ကလေး ဒီလူတွေနဲ့ဝေးရာမှာ မင်းကို ကိုယ်က တပ်မက်စွဲလန်းမှုတွေနဲ့ ချစ်မိပါတယ် ကလေးရေ...

ဘာရှင့် ကျွန်မကိုချစ်တယ်ဟုတ်လား..
ဒါကျွန်မအတွက် အရယ်ရဆုံး ဟာသပဲ အချစ်က အစာအိမ်နဲ့တွေ့ရင် အဝေးကြီးရောက်သွားမှာ နေပါဦး...ဒီစာသားထဲမှာ ရှင့်လိင်စိတ်ကြီး ဘယ်လောက်ပါလဲ ချစ်ခြင်းမေတ္တာဟာ ကိုယ်ထိလက်ရောက်စော်ကားခံရခြင်း တစ်မျိုးပဲ အချစ်ကဗျာလေး တစ်ပုဒ်နှစ်ပုဒ်လောက်နဲ့ တက်မလာနဲ့ ကျွန်မက ရှယ်လီနဲ့ ဘိုင်ရွန်တောင် ရင်မခုန်ဘူး ဆိုနေတဲ့ သီချင်းက Do it like a dude ဘာနဲ့မှ မချုပ်နဲ့ လိုအပ်ရင် မိုးမွှန်အောင် ရိုင်းစိုင်းပစ်လိုက်ဖို့ အဆင်သင့် စီးကရက်၊အရက်နဲ့ စိတ်ကြွဆေးပြား ရှင်ဘယ်လိုနားလည်ထားလဲ အရှက်ရော အသက်ရော လိုချင်ရာနဲ့လဲပစ်လို့ရတယ် Do or die ပဲ 

ကြွပ်ဆပ်ဆပ်ခေတ်ကြီးမှာ ကျိုးကျေရာတွေများလာတာ ဘာများဆန်းလဲ နှလုံးသားက အစာအိမ်နဲ့ အဝေးကြီးပဲဆိုတာ သိပ်မှန်တာပေါ့ ကလေး ချစ်ခြင်းမေတ္တာမပါပဲ စိတ်ပါလက်ပါ ဘယ်သူ့ကိုများ ဆက်ဆံလို့ရမလဲ နန့်ကြောထ အချစ်ကဗျာတွေထဲ ကိုယ့်ကဗျာကို ဆွဲမထည့်ပစ်လိုက်ပါနဲ့ ဗီးနပ်စ်လောက်နဲ့ တက်လာရင် တောက်ချခံရမယ့် ကဗျာခေတ်လေ ကလေးရဲ့ ခေတ်ပေါ်မိန်းမတစ်ယောက်ရဲ့ စရိုက်အတိုင်း မင်းကိုယ်မင်း ဆိုရှယ်ကျချင်ကျပေါ့  ကိုယ့်ကျင့်တရားနဲ့ ကိုယ်ချင်းစာတရားကိုတော့ အလုံးလိုက်လဲတပ်လို့မရဘူးဆိုတာ မင်းသိထားရမယ် ကလေး

ဟင်းဟင်း.. ဟုတ်တယ် ကျွန်မက သံချေးတက်နေတဲ့မိန်းမ ဘာဖြစ်သေးလဲ I don't care ဟိုက်ထားတဲ့ ရင်သားတွေကို ရှင်တို့ပဲကြည့်ပြီး ယဉ်ကျေးမှုနဲ့ ရိုင်းစိုင်းလိုက်ကြ ရမ္မက်တွေ ပွစာကြဲနေတဲ့ ဦးဏှောက်ကြီးနဲ့ ဝေဖန်လိုက် မျက်လုံးတွေက ဗိုက်သားဝင်းဝင်းတွေကို စိုက်ဝင်နေတယ် လူတွေရဲ့ ဟန်ဆောင်မှုက နွေရာသီထဲမှာ European suite ဝတ်လာတဲ့ လူကြီးလူကောင်းလိုပဲ အိုက်စပ်စပ်နဲ့ ကြည့်မကောင်းတဲ့ Fashion ကျွန်မဝတ်ထားတဲ့ ဝမ်းကွာတားနဲ့ ကျွန်မ ရှင်ကရော ဘယ်ဟာကိုချစ်တာလဲ ရှင်တို့ ပါးစပ်ထဲမှာ Free style ဆိုသလို မုသား flow တွေအပြည့် နားထောင်ကြည့်သေးတာပေါ့ ရှင့်ရဲ့ပစ်ပေါက်မယ့် စကားလုံးတွေကို

အကျော်အခွ လည်ပင်းဖြတ်နင်းခံရတဲ့ လုပ်ရပ်တွေမှာ မင်းဟာ နှစ်ဖက်သွားဓါးတစ်ချောင်းယောင် ဆောင်ထားပါ ကလေး လောကကြီးက ငွေသံတချွင်ချွင်မြည်မှ အရသာခံလို့ရမယ်တဲ့လေ အောက်သွေးတိုးနေတဲ့ လူ့ယဉ်ကျေးမှုကြီးကိုတော့ ဂရုမစိုက်နဲ့တော့ ကဗျာဆရာကိုသျှား ပြောသလို ကိုယ့်မုသားဟာ အနုပညာဆန်တဲ့ လှပတဲ့ မုသားပေါ့ ကလေး ကိုယ့်ချစ်ခြင်းတရားကို တစ်ခါသုံးခွက်တစ်ခုထက် တန်ဖိုးထားစေချင်တယ် မင်းဟာကိုယ့်ရဲ့ ဆွဲဆောင်မှုအကောင်းဆုံး စကားလုံးတွေနဲ့ စာသားအဆောက်အအုံတစ်ခုပေါ့ ကလေးရယ်

ရှင်ကလဲ ခုနှစ်ဆွေး ရှစ်ဆွေးက သားမှတ်မှတ် မယားမှတ်မှတ်တွေကို ဆလမ်းလာရွတ်ပြန်ပြီ
ထားလိုက်တော့ ရှင့်စကားလုံးတွေ ပြန်သိမ်းထား အိတ်ကပ်ထဲကို ရေအပြည်ခပ်လာခဲ့ လန်းမယ့်နေရာတွေ ဒိုးမယ်ဆို ရှင့်ဖုန်းနံပါတ် ကျွန်မကိုပေးထား အလျော်အစားကြမ်းချင် ကြမ်းမယ် မအံ့သြနဲ့ ကျွန်မက တစ်ခါတစ်လေ မိန်းမစစ်စစ် တစ်ခါတစ်လေ Lesbian အခုလောလောဆယ် မလန်းဆန်းတော့တဲ့ စကားလုံးတွေနဲ့ ပစ်ပေါက်တဲ့ ရှင့်ရင်ခုန်သံကို ခံနိုင်ရည်ဘယ်လောက်ရှိမလဲလို့ စမ်းသပ်ချင်တယ် ရှင့်သဘောတူညီချက်ကို မက်ဆေ့ခ်ျပြန်ပို့လိုက်...

ဟားဟားး.. အိုကေ တော်ကီခေတ်ကြီး အသက်ရှုရပ်သွားပြီးဆိုတာ မင်းနဲ့ကိုယ်နှစ်ယောက်စလုံး သိပြီးတဲ့နောက်ပေါ့ ကလေးရေ..။

(ခေတ်ပေါ်ဈေးကွက်ထဲက အလန်းဇယား... ကဗျာကို ပြန်ပြင်ပြီး ရေးထားခြင်းမျှသာ)

ကျော်ဦး(လှိုင်)

လွင့်ကျခဲ့သော အနာရွတ်များ

စိတ်တွေလေးနေတဲ့ မနက်ခင်းမှာ ဖြတ်ရိုက်ခံရတဲ့မျက်နှာလို မာနတွေရောင်ကိုင်းနေခဲ့ရ သူတို့ထွေးတဲ့အရာတွေကို ကိုယ်က သည်းခံနေရအောင် မြေကြီးမှမဟုတ်ခဲ့တာ။ အချိန်မရွေးပေါ့ ပေါက်ကွဲထွက်နိုင်အောင် ပြင်ထားခဲ့တာ ပြင်းအားမကောင်းပေမယ့် ရင်းကြကြေးဆိုရင် ကိုယ်လည်း အသေခံ ကိုယ့်လည်ပင်းကိုယ်သွေးထားခဲ့တာပါ။ အမှောင်မှာ ရမ်းသမ်းပြီးစမ်းနေပေမယ့် ရစ်သမ်မိနေတဲ့ အချိုးတွေကြားမှာ ကိုယ်ကဘာငြင်းနေအုံးမှာလဲ မစ္စတာမိုးဇက် ခင်ဗျားဂီတကိုကျနော် ဝေဖန်စရာမှမလိုတာလေ။ သေခြင်းတရားနဲ့ကိုယ်တို့က လက်ဆွဲနုတ်ဆက်ထားတဲ့ အိမ်နီးချင်းတွေ မှတ်မှတ်ရရ ကိုယ့်နေရာကိုယ်ရှာတွေ့ခဲ့တဲ့နေ့က ကိုယ့်သမိုင်းထဲမှာ ကိုယ့်ကဗျာတွေ ဒီမိုကရေစီရထားတာ ဆယ်နှစ်ကျော်ပြီ မိတ်ဆွေဆိုတာ ပုလင်းမတူပေမယ့် ဘူးဆို့တာချင်းတော့ တူခဲ့တာပဲ ကိုယ်နဲ့သူတို့က ဘာသာစကားတွေ ဓါတ်ခွဲခဲ့ကြသေးတယ် လိမ်ပြောတာချင်းအတူတူ ကမ္ဘာသုံးစကားက အပြစ်နည်းတယ်တဲ့လား ခွင့်လွှတ်ပါ ကိုယ်ရဲ့ထော့ကျိုးဘာသာစကားက ထောင့်ကျိုးချင်မှကျိုးမယ် ကိုယ်လည်းကဗျာဓါတ်ခပ်ပါးပါးနဲ့ ဘာတော့ဘရက် ကဗျာတွေကို အရိုးမရှိတဲ့လျှာနဲ့ ရွတ်ပြချင်တာပေါ့.။ အဲဒီမှာ ယုံကြည်ချက်နဲ့ရွတ်နေတဲ့ကဗျာတွေရှိတယ် အစာချေဖျက်အားကောင်းတဲ့ခေတ်မှာ အူပါးလာတဲ့ကဗျာတွေက သိပ်ချစ်ဖို့ကောင်းတာပေါ့။ ကိုယ့်လမ်းကိုယ်လျှောက်ရင်း ကိုယ့်ခန္ဓာကိုယ်ကို အားရပါးရ ငိုချင်းချခဲ့တာပါ အောင်မြင်မှုဆိုတာ လက်တစ်ဆန့်စာအကွာအဝေးလေ အဲဒီအတွက်တော့ ကိုယ်ပိုင်ဆုံးဖြတ်ချက်ကို အဓမ္မမကျင့်ခိုင်းပါနဲ့ လူလူချင်းအရိုးလုနေတာကို ကိုယ့်မာနက ပြန်ရှက်ခိုင်းနေလို့ပါ။ အနာရွတ်တွေ အသိုင်းနဲ့အဝိုင်းနဲ့ နေတဲ့အထဲ ကိုယ့်လျှာနဲ့ သူများအနာတွေသပ်ခဲ့တာမဟုတ်ဘူး ကိုယ့်မွန်းကြပ်မှုကို အရောင်းစွံမလားလို့ ခံစားချက်တွေ အရောင်တင်ကြည့်တာ ကိုယ့်ညနေကတော့ အခုထိခပ်မွဲမွဲပဲ။ အစွဲအလမ်းတွေထဲမှာ နတ်တင်သလို ကိုယ့်ကဗျာတွေ ခွဲတမ်းအချခံဖို့ မဟုတ်ဘူး။ ကိုယ်က မြတ်နိုးတဲ့အရာတွေကို သွေးကြောထဲ အစွန်းရောက်အောင် ထိုးထည့်ထားတဲ့ကောင်လေ သက်သာရာရမလားလို့ ပက်လက်အိပ်တဲ့အထဲ ကိုယ်မပါချင်ဘူး။ (ကို)လှသန်းလိုပဲ ကိုယ့်အကြောင်းမေ့ထားချင်လို့ ကိုယ်ကလည်း သူများအကြောင်းတွေ လျှောက်ပြောနေခဲ့တာပါ တကယ်တော့ ကျကျန်ခဲ့တဲ့ တပိုင်းတစ်စတွေလိုက်ကောက်ရင်း ဆေးထူထူသိပ်ထားတဲ့ အနာတွေ ရင်းသထက်ရင်းလာတယ်။ ကိုယ့်ခန္ဓာငါးပါးမှာ ဝေဒနက္ခန္ဓာ အင်းအားကြီးနေခဲ့တာကိုတော့ အားလုံးမသိအောင် ဟာသလုပ်ထားခဲ့တာပဲလေ..။

ကျော်ဦး (လှိုင်)

ညီမလေးကို ပေးလိုက်ပါ

လမင်းကြီးက သိပ်သာယာတယ် ညီမလေးရယ်
ကိုကိုက ညီမလေးကို ပုံပြင်လေးပြောပြမှာပေါ့
ဆာလောင်မှုတွေကြားမှာ နားနားနေနေ နေလို့မရဘူးလေ
ယာယီတဲလေးမှာ ဆန်ကြမ်းတွေကို မဝရေစာလေးနဲ့
ကိုကိုတို့ အံကြိတ်ပြီး ဖြတ်သန်းရအောင် ညီမလေးရယ်
အားတင်းထားပါ ညီမလေး မီးဆိုတာ အချိန်တန်တော့ ငြိမ်းမှာပေါ့ကွယ်
ကျောင်းတက်ခေါင်းလောင်းလေးကို သတိရတယ်
အတန်းဖော်သူငယ်ချင်းတွေကို သတိရတယ်
ကွဲကွာသွားတဲ့ အဖေနဲ့အမေကို သတိရတယ်
နှင်းတွေဆိုင်းနေတဲ့ အိမ်ဝိုင်းလေးကို သတိရတယ်
အဖေ့ရဲ့ပုံပြင်နဲ့ ထမင်းခွံ့တဲ့ အမေ့လက်ကို လွမ်းတယ်တဲ့လားညီမလေး
ချမ်းနေပြီလား ညီမလေးရယ် အနွေးထည်မရှိတဲ့ ဒီဆောင်းမှာ
ညီမလေး အင်္ကျီလေး မလဲ/မလျှော် ဖြစ်သေးဘူး
အပြစ်ကင်းတဲ့မျက်နှာလေးမှာ စစ်ရဲ့ဒဏ်ချက်တွေနဲ့
စိတ်မလျှော့လိုက်ပါနဲ့ ညီမလေးရယ် ကိုကို ထွေးပွေ့ထားပါ့မယ်
သေနတ်သံတွေကြားရင် နုတ်ခမ်းလေးတွေ တဆတ်ဆတ်တုန်လို့
အရွယ်နဲ့မလိုက်အောင် ကြောက်ရွံမှုတွေကြီးစိုးခံရတဲ့ ညီမလေးရယ်
ညီမလေးရဲ့ ဆံပင်လေးတွေ ဆီမရှိပဲ ခြောက်ကပ်နေတယ်
ညီမလေးရဲ့ အသားအရေလေးတွေ ရေဓါတ်ခန်းခြောက်နေတယ်
ညီမလေးရဲ့ မျက်နှာလေး အချိန်တိုင်း ကြောက်လန့်နေတယ်
ညီမလေးရဲ့ ဆိုနေကျသီချင်းလေး နုတ်ဖျားကနေ ထွက်ကျမလာတော့ဘူး
ညီမလေးရဲ့ ကြယ်စင်လေးနှစ်ပွင့်က မလင်းလက်နိုင်တော့ဘူး
ကိုကို့ရင်ခွင်ထဲက ညီမလေးရဲ့ ဆုတောင်းသံတိုးတိုးလေးက ကြေကွဲနေရှာတယ်
အို..အဖဘုရားသခင် သေနတ်သံတွေ ဖယ်ရှားပေးပါတဲ့လားကွယ်...။

ကျော်ဦး (လှိုင်)

ပန်းနုရောင်နေ့ရက်များ

သံတူကြောင်းကွဲ အက်သံတွေထဲမှာ ကျွန်တော်နဲ့ပန်းနု ရိုးရိုးလေးပဲဆုံခဲ့ပါတယ်။ မည်းမှောင်နေတဲ့ မိုးသားတွေ အောက်မှာ ကျနော် ထီးမပါပဲလျှောက်သွားခဲ့မိပါတယ်။ သူမကလည်း ကျနော့်လိုပဲ ဦးတည်ရာမဲ့လမ်းလျှောက်လာခဲ့တယ်။ သူမနဲ့ကျနော် ခလုပ်တိုက်ခဲ့မိရုံလေးပါ။ ချစ်သူအဖြစ်မှ ရပ်စဲခြင်းခံရသူတစ်ယောက်နဲ့ လွေလွင့်နေတဲ့ နှလုံးသားတစ်ခု ပူးပေါင်းရေးကော်ဖီတစ်ခွက်စီကို နှစ်နှစ်ခြိုက်ခြိုက်သောက်ခဲ့မိကြတယ်။ ပန်းနုဆိုတဲ့ ပညတ်အတိုင်း သူမဝတ်ထားတဲ့ ပန်းနုရောင်အထက်အောက် ဆင်တူအကျီင်္လေးနဲ့သိပ်ကိုလှပါတယ်။ ဖြစ်ရိုးဖြစ်စဉ် အသည်းကွဲဇာတ်လမ်းထဲမှာ ပန်းနုနဲ့ကျနော် လက်ဆွဲနုတ်ဆက်လိုက်ကြတယ်။ သိပ်ချစ်စရာကောင်းတဲ့ ပန်းနုကို သူ့ချစ်သူက ဘာအတွက်လမ်းခွဲသွားခဲ့တာလဲ။ အဖြေမရှိတဲ့ပုစ္ဆာတစ်ပုဒ်လိုပါပဲ။ တစ်ခါတစ်လေ ပန်းနုဆိုတဲ့ကောင်မလေးက သိပ်ကိုဟာသဆန်တယ်။ တစ်ခါတစ်လေ အတွေးအခေါ်ရင်ကျက်တယ်။ တစ်ခါတစ်လေ ကလေးအရမ်းဆန်တယ် ကပ်သီးကပ်သပ် သိပ်ကိုနိုင်ပါတယ်။

ပန်းနုနဲ့ကျနော် ချိန်းထားတယ်။ အင်းလျားကန်ဘောင်ရဲ့ ခုံတန်းတစ်ခုမှာပေါ့။ ကျနော်စရောက်ပြီး နာရီဝက်သာသာအထိ ပန်းနုရောက်မလာသေးဘူး။ အင်းလျားကန်ရဲ့ရေပြင်ကို ငေးကြည့်နေရင်း ကျနော် ထိုင်စောင့်နေခဲ့တယ်။ စိတ်ကူးတွေနဲ့ အင်းလျားကန်ရေပြင်ကို ကျနော် ပန်းချီတစ်ချပ်ဆွဲနေခဲ့မိတယ်။ ဘယ်လောက်ကြာသွားတယ်တော့မသိဘူး ဘေးနားက ဆူညံနေတဲ့စကားပြောသံတွေက ကျနော့်ကိုလှုပ်နှုိုးမှ သတိဝင်လာတယ်။ ကျနော်လှည့်ကြည့်တော့ ပန်းနုနဲ့ ကန်ဘောင်ရဲ့အစောင့်နှစ်ယောက် စကားများနေတာကို တွေ့လိုက်ရတယ်။

“ ကျမ ပိုက်ဆံအိတ်ပျောက်တာ ဘယ်လိုလုပ်ပေးမှာလဲ ”
“ ဟာ..ကျနော်တို့နဲ့ဘာဆိုင်လို့ လာပြောနေတာလဲဗျ ”
“ ရှင်တို့နဲ့မဆိုင်ရင် ရှင်တို့ကိုရဲသွားတိုင်မယ် ”
“ ကျနော်တို့ကို ဘာလို့ရဲသွားတိုင်ရမှာလဲဗျ ”
“ ရဲမတိုင်လို့ ဘယ်သူ့ကိုသွားတိုင်ရမှာလဲ ”

အစောင့်နှစ်ယောက်ခမျာ သူမနဲ့စကားပြောရင်း ခေါင်းတွေတဗျင်းဗျင်းကုတ်နေပြီ။ ကျနော်ရောက်သွားတော့ ပန်းနုက

“ အဲဒါကျမရည်းစားပဲ ရှင်တို့နာဖို့သာပြင်ပေတော့ သူက ကရာတေးခါးပတ်နက် ရထားတာ ”

အစောင့်နှစ်ယောက်က သူမအဲဒီလိုပြောလိုက်တာနဲ့ ကျနော့်ကို ဂရုတစိုက်သေချာကြည့်နေပြီ။ ကျနော်လည်း အစောင့်နှစ်ယောက်ကို မျက်စေ့မှိတ်ပြပြီး ထွက်သွားဖို့ အချက်ပြလိုက်တယ်။ အစောင့်နှစ်ယောက် ထွက်သွားချိန်မှာတော့ သူမဒေါသတွေက ကျနော့်အပေါ်စုပြုံကျလာပါတယ်။

“ နင်ကလည်း အားကိုးရမလားလို့ ရည်းစားခဏတော်ပါတယ် အသုံးကိုမကျဘူး ”

ဟုပြောကာ ဆတ်တောက်ဆတ်တောက်နဲ့လျှောက်သွားပြီး ခုံပေါ်ကိုထိုင်ချလိုက်တယ်။ ကျနော်က ပိုက်ဆံအိတ် တကယ်ပျောက်သွားတာလားလို့မေးတော့ အစောင့်နှစ်ယောက်က အတွဲချောင်းနေတာကို ကြည့်မရလို့ သက်သက်ရစ်တာတဲ့လေ။ ကဲ ဘယ်လောက်ကပ်သီးကပ်သပ်နိုင်လိုက်တဲ့ ကောင်မလေးလဲဗျာ။

“ ပန်းနု မနေ့ကနင့်ကို ငါမေးထားတာလေ အဲဒါဒီနေ့ပြောပြမယ်ဆို ”
“ အေးပါ ပြောပြမလို့နင့်ကို ဒီကိုလာခိုင်းတာပေါ့ဟ ”
“ ဒီလိုဟ ငါ့ချစ်သူက ငါ့ကိုသိပ်ချစ်ပါတယ် ငါထင်တာပြောတာနော် ”
“  ဒါပေမယ့် ငါကသူ့ကိုမချစ်ဘူး သံယောဇဉ်လေးနဲ့တွဲမိခဲ့တာဟ ပထမတော့   
  ငါလည်းသူ့ကိုချစ်တယ်ထင်တာ   အခုတော့ ငါသူ့ကိုမချစ်ဘူးဆိုတာသိလို့ လမ်းခွဲလိုက်တာ ”
“ ဟင်...နင်ပြောတော့ သူကဖြတ်သွားတာဆို ”
“ အဟဲ.. နင်သနားပြီး ကော်ဖီတိုက်အောင်လိမ်ပြောလိုက်တာ ”

ကျနော့်မှာရယ်ရအခက် ငိုရအခက်နဲ့ စိတ်ဆိုးလို့ကလည်းမရ။ သူမကတော့ ပေါ့ပေါ့ပါးပါးပဲ ရေပြင်ကိုကြည့်နေရင်းနဲ့ ပြောနေပုံက ကလေးတစ်ယောက်လို ဖြူစင်လွန်းလို့ ကျနော်သူမကိုပဲ ငေးကြည့်နေမိတယ်။ ဆည်းဆာအကျနေရောင်ခပ်ပါးပါးလေးမှာ သူမရဲ့ဆံနွယ်လေးတွေလွင့်မျောနေပုံက သိပ်ကိုလိုက်ဖက်လွန်းတယ်။ အဲဒီညနေခင်းလေးမှာ သူမနဲ့ကျနော် အချိန်တော်တော်ကြာ ဘာစကားမှမပြောဖြစ်ပဲ ထိုင်နေမိတယ်။ သူမကိုကြည့်နေရင်းနဲ့

“ ပန်းနု နင့်ကိုငါ ချစ်တယ် ”
“ ဘာ... နင်ငါ့ကိုရည်းစားစကားပြောတာလား ”
“ ဟုတ်တယ်.. နင့်ကိုငါ ချစ်တယ် ပန်းနု ”

သူမတစ်ချက်တွေဝေသွားတယ်။ အဝေးကိုငေးကြည့်နေရင်းကနေ

“ ငါ သိပါတယ်ဟာ ဒါပေမယ့် နင့်ကိုငါချစ်ချင်သလိုတော့ရှိတယ် မသေချာသေးဘူး ဘာဖြစ်လို့လဲဆိုတော့ နင်က  ငါ့သူငယ်ချင်းဖြစ်နေလို့ပဲ ”

သူမဆီက စကားသံတွေ တိတ်ဆိတ်သွားတယ်။ သက်ပြင်းရှည်တစ်ခုချလိုက်ရင်း ပြန်တော့မယ်လို့ နုတ်ဆက်ပြီး သူမထွက်သွားတယ်။ ကျနော် သူမကို လိုက်ပို့ခွင့်ဘယ်တော့မှ မရခဲ့ပါဘူး။ လိုက်ပို့မယ်လို့ ပြောလိုက်မိတိုင်း သူမက လိုက်ပို့ရင်နောက်တစ်ခါ နင်နဲ့မတွေ့တော့ဘူးလို့ ပြောခဲ့တယ်လေ။ ပန်းနုရယ် ခံစားခွင့်ဆိုတာ တစ်ခုရရင် တစ်ခုကိုပေးလိုက်ရမှာလား လောဘကြီးတာတော့ မဟုတ်ပါဘူး ငါလည်း ရမယ်ဆိုရင် လိုချင်ခဲ့သူပါလေ။

ဒီနေ့ ပန်းနုက ကျနော့်ကို ကန်ဘောင်မှာပဲ တွေ့ဖို့ချိန်းထားတယ်။ အချိန်က ညနေ ငါးနာရီ။ နင်မလာရင် နောင်တရမယ်နော်တဲ့လေ။ သူမအဖြေများပေးမလို့လား။ ဘာအကြောင်းကြောင့်များလည်း ဆိုတဲ့အတွေးတွေနဲ့ ကျနော်ထွက်လာခဲ့ပါတယ်။ ထိုင်နေကျ ခုံတန်းလေးမှာ ထုံးစံအတိုင်းပဲ ပန်းနုကိုထိုင်စောင့်နေခဲ့ပါတယ်။ တရွေ့ရွေ့ကုန်သွားတဲ့ အချိန်တွေကြားမှာ စီးကရက် တစ်လိပ်ပြီးတစ်လိပ်ဖွာရင်းနဲ့ပေါ့။ ရောက်နေကျ အချိန်ထက်နောက်ကျနေပြီ။ ဆည်းဆာက တဖြည်းဖြည်းချင်းအမှောင်ကျလာခဲ့ပြီ။ နီယွန်မီးတွေထွန်းညှိထားတဲ့ မြို့ပြယဉ်ကျေးမှုစတင်လာပြီ။ ပန်းနု ရောက်မလာသေးပါလား။ လွဲတတ်လွန်းတဲ့နာရီကိုကြည့်တော့ ရှစ်နာရီထိုးသွားပြီ။ နောက်ထပ်အချိန်နည်းနည်းကြာတာနဲ့ ကန်ဘောင်ပိတ်တော့မယ်။ ပန်းနုရောက်မလာသေးဘူး ဘာများဖြစ်နေလဲပန်းနုရယ်။ ကန်ဘောင်ပိတ်ချိန်အထိ ထိုင်စောင့်နေခဲ့တယ် ပန်းနုရောက်မလာခဲ့ဘူး။နောက်နေ့တွေလည်း ထိုင်စောင့်နေခဲ့တယ်။ ညနေငါးနာရီကနေစပြီး ကန်ဘောင်ပိတ်ချိန်ထိ။ ပန်းနုရောက်မလာခဲ့ဘူး။

ဒီနေ့လည်း ကျနော်ထိုင်စောင့်နေခဲ့တယ်။ အရင်လိုပဲ စီးကရက်တစ်လိပ်ကိုဖွာရှိုက်ရင်းနဲ့ ကန်ရေပြင်ကို ငေးကြည့်နေမိပါတယ်။ ပန်းနုနဲ့ပတ်သတ်တဲ့ အကြောင်းလေးတွေတွေးနေခဲ့တယ်။ ကျနော့်နောက်က အငြင်းအခုန်ဖြစ်နေတဲ့စကားပြောသံ ကြားလိုက်ရတယ်။ ရင်ထဲမှာ သိပ်ကိုဝမ်းသာသွားမိတယ်။ ပန်းနုရောက်လာခဲ့ပြီလေ။ ကြည်နူးစိတ်တွေနဲ့လှည့်အကြည့် ကန်ဘောင်စောင့်နှစ်ယောက်နဲ့စကားများနေတဲ့ကောင်မလေးတစ်ယောက် ဒါပေမယ့် ပန်းနုမဟုတ်ဘူး။ ကောက်ရိုးမျှင်လေးတစ်ပင် ထောင်းခနဲပြတ်တောက်သွားသလို ခံစားလိုက်ရတယ်။ စိတ်ထဲအလိုလိုဝမ်းနည်းလာတာနဲ့ ခုံတန်းကနေ ထလာပြီးကန်ဘောင်ပေါ်ကလှေကားအတိုင်းဆင်းလာခဲ့တယ်။

“ ဟဲ့ နင်ကငါ့ကို မစောင့်တော့ဘူးလား ”

ဟာ.. ဒါပန်းနုရဲ့အသံ။ ကျနော်လှည့်ကြည့်တော့ ကျနော့်နတ်သမီးလေးက လှပစွာ ပြုံးနေတယ်။ ကျနော့်ဆီကို လှေကားတစ်ထစ်ချင်း ဆင်းလာပြီးတော့

“ ငါနေ့တိုင်းရောက်ပါတယ်ဟ နင့်ကို အသိမပေးပဲ ချောင်းကြည့်နေတာ နင်တော်တော်ဇွဲကောင်းတာပဲ ”
“ နင်ကလည်းဟာ ရောက်လာရဲ့သားနဲ့ ငါ့ကိုဘာလို့မခေါ်တာလည်း ငါ့မှာတော့ မောလှပြီဟ ”
“ အေးပါ အခုတော့ ငါသိပါပြီ နင်ကလည်းငါ့ကို တကယ်ချစ်တယ်ဆိုတာ.. ဒီနေ့တော့ နင့်ကိုငါအဖြေပေးမယ်
  ဟန်ဆောင်မနေတော့ပါဘူးဟာ ငါလည်း နင့်ကိုချစ်ပါတယ် ”

ကျနော်စိတ်တွေ တိမ်တွေနဲ့မြောက်တက်လွင့်ပါသွားတယ်။ လောကထဲမှာ ကျနော့်လောက် ကံကောင်းတဲ့သူရှိမှာမဟုတ်ဘူး။ ဝမ်းနည်းစရာတွေ ပျောက်ပျက်သွားပြီ။ သူမက ကျနော့်အတွက် ပျောက်နေတဲ့ကိုယ်တစ်ခြမ်းလား။ ခွန်အားတွေကိုပေးမယ့် နတ်ပျိုမလေးလား။ အခက်အခဲတွေ့တိုင်းအားပေးမယ့် ချစ်သူတစ်ယောက်လား။ ရင်ထဲမှာ တွန်းထိုးရုန်းကန်လှုပ်ရှားရင်းနဲ့ သူမကိုပြောဖို့ စကားတွေဆွံ့အနေခဲ့ပါတယ်။

“ နင့်ကိုငါက မောင်လို့ခေါ်မယ်ဟာ ”

သူမဘက်မှ လိုလိုလားလားပြောလာတာကို ကျနော့်နားတွေ မယုံနိုင်ဘူးဖြစ်နေတယ်။ ငါအိပ်မက်များမက်နေလား ပန်းနုရယ်။ သူမနဲ့ကျနော် လှေကားထစ်လေးမှာ ယှဉ်တွဲထိုင်ပြီး သူမက ကျနော့် ပခုံးပေါ်မှာ ခေါင်းမှီရင်းနဲ့ တီးတိုးစကားတွေ အများကြီးပြောဖြစ်ခဲ့တယ်။ အချိန်တော်တော်လေးကြာတော့ သူမကပဲ

“မောင် ငါပြန်မယ်ဆိုရင်နင်တားမှာလား ”
“မတားပါဘူးဟာ နင့်ကိုလိုက်ပို့ချင်တယ် ”
“မပို့ပါနဲ့မောင်ရယ် ထားလိုက်ပါတော့ ကဲငါပြန်တော့မယ်နော် မောင် ” ဆိုပြီး သူမအိတ်ကိုဖွင့်လိုက်တယ်။ ကျနော့်ကို သေချာကြည့်ပြီးတော့

“ ရော့ ဖိတ်စာ မောင် နင့်အတွက်ငါယူလာတာ ”
“ ဘာ ဖိတ်စာလည်းဟ ”
“ မင်္ဂလာဆောင်ဖိတ်စာလေ ငါ့မင်္ဂလာဆောင်ဖိတ်စာ မနက်ဖြန်လေ ”
“ ဘာ.... နင်နောက်နေတာလား ပန်းနု ”
“ နောက်စရာလားဟ တကယ်ပြောနေတာ ငါနင့်ကိုချစ်ပါတယ် ဒါပေမယ့် ဒီနေ့တစ်ရက်ပဲ ချစ်သူဖြစ်ရတော့မှာ
  နောက်နေ့မှာ ငါတို့ဆုံတွေ့ခွင့်မရှိတော့ဘူး ”
“ ပန်းနု အဲဒါ ဘာသဘောလဲဟာ.. ငါနားမလည်တော့ဘူး ငါကနင့်ကိုလက်ထပ်ဖို့ ရည်ရွယ်ထားတာလေဟာ ”
“ နင့်ကိုငါ တကယ်ကိုချစ်တယ် ဒါပေမယ့် လက်ထပ်ဖို့က ချစ်တာနဲ့မဆိုင်ဘူး ချစ်တာနဲ့လက်ထပ်တာ တခြားစီပါ မောင်ရယ်
  ငါပြန်တော့မယ် မောင်ရယ် နင့်ကိုငါ သိပ်ချစ်ခဲ့ပါတယ် ”

သူမနုတ်ဖျားမှ မောင် လို့ခေါ်လိုက်သံကို ထပ်ကြားမိတော့ ကျနော့်စိတ်တွေ ပိုပြီး ဆိုနင့်ခဲ့ရပါပြီ။ ဘာကိုမှ သေချာမမြင်နိုင်တော့ပဲ ဝမ်းနည်းစိတ်တွေက ခန္ဓာကိုယ်တစ်ခုလုံးကြီးစိုးခဲ့ပြီ ပန်းနုရယ်။ အသည်းမာလိုက်တာ ပန်းနုရယ် ကျောခိုင်းသွားတဲ့ ခြေလှမ်းတွေက လှလှပပ နင်းဖြတ်သွားတယ်။ ပန်းနုဖြတ်သွားတာ အသမာတက်နေတဲ့ကတ္တရာလမ်းမဟုတ်ပါဘူး ငါ့နှလုံးသားပါဟာ..။

အခုဆို  အင်းလျားကန်ရဲ့ မျက်နှာချင်းဆိုင် ထိုင်ခုံလေးမှာ နေ့တိုင်း နင့်ရဲ့ကြည်စယ်မှုတွေကို စောင့်မျှော်နေခဲ့ပါတယ်။ နင့်မှာရှိတဲ့ ရောဂါဆိုးကြီးကို ပြောပြလည်း ငါနင့်ကိုပဲ လက်ထပ်မှာပါ ပန်းနုရယ်။ အခုတော့ ငါနဲ့အဝေးဆုံးကို ထွက်သွားခဲ့ပြီပေါ့။ လောကရဲ့လှည့်ကွက်ထဲမှာ ကံအကြောင်းမလှလို့ နင့်ရဲ့ဖြူစင်တဲ့ဘဝလေး မသန့်တဲ့သွေးတစ်ချို့ကြောင့် အရိပ်မည်းကြီး ကြီးစိုးသွားတာပါ။ ငါ နင့်အပေါ်မှာ တစ်ခါမှ အထင်မသေးခဲ့ပါဘူး ပန်းနုရယ်။ အခုတော့ ငါ့လက်ထဲမှာ မင်္ဂလာဆောင်ဖိတ်စာနဲ့ မပန်းနု(အသက် ၂၅ ) ဆိုတဲ့ဖိတ်စာလေးကိုင်ထားပါတယ် ပန်းနုရယ်..။ နင်ငါ့ကို အရမ်းအနိုင်ကျင့်တာပဲ ပန်းနုရယ်။ ငါ့နာမည်နဲ့နင့်နာမည်ပါတဲ့ ဖိတ်စာနဲ့ နင့်အတွက်သီးသန့်ဖိတ်စာ ငါဘာကိုများ ယုံကြည်ရမှာလည်းကွယ်...။

ကျော်ဦး (လှိုင်)

မျက်ရည်စီးကြောင်း

ဒဏ်ရာဆိုတာက နက်နက်နဲနဲ ဝင်ပြီးခံစားမှ အရသာရှိတာမျိုးလေ
အစိမ်းရောင်ချို့တဲ့နေတဲ့ မြက်ပင်လေးတွေခမျာ သူတို့အနာတွေပေါ် တုတ်ကျခံရတာ သနားပါတယ် ညီမလေးရယ်
မှန်တစ်ချပ်ရဲ့ ကြည်လင်မှုအပေါ်မှာ ကိုယ်အခွင့်အရေး မယူခဲ့ပါဘူး
အထင်လွဲမှုဆိုတဲ့ အနားသတ်မျဉ်းကို ဖြတ်ကျော်ဖို့ ဘာလို့များစဉ်းစားနေရတာလည်း ညီမလေးရယ်
ကိုယ်က ငါးပွက်ရာမှာ ချကျွေးခံလိုက်ရတဲ့ ငါးစာ ခံစားခွင့်ဆိုတာကို လျစ်လျူရှုခံရတဲ့ ပြည်သူသက်သက်
အချစ်နဲ့ပတ်သတ်လာရင် အူရိုင်းသက်သက်ရယ်ပါ
မက်မောမှုတစ်ချို့တစ်ဝက်တော့ သားလှီးဓါးတစ်ချောင်းနဲ့ တစ်လွှာချင်းခွာမချချင်ပါနဲ့ကွယ်
ကိုယ့်ရင်ခုန်သံတွေက မုန်တိုင်းမိတဲ့ငှက်လို လှည့်ကွက်တွေကြားမှာ ထိတ်လန့်နေရတုန်းမို့ပါ
မပြောပါနဲ့ ညီမလေးရယ် အဲဒီအငြင်းဝါကျလေးက ကိုယ့်ကိုဝါးကူထိုးတော့မယ်လေ
ပြတ်တောင်းတောင်း ကြိုးလေးတစ်ချောင်းကိုတော့ နောက်မှီးပါးနေတဲ့ ရှင်သန်မှုအတွက် ကိုယ့်ကိုပေးပါ ညီမလေးရယ်
အဝေးက ညီမလေးရဲ့မျက်ဝန်းတစ်ချက်အပင့်မှာ ကိုယ့်နှင်းတွေကျဆင်းဖူးတယ်
ဗီးနပ်စ်ကမနာလိုဖြစ်တဲ့ ကိုယ့်နတ်ဘုရားမလေးက အသိစိတ်တွေအကုန်လုံးကို အမှောင်ချထားခဲ့တယ်
ဖောက်ပြန်လာတဲ့ အမှန်တရားကြားမှာ ကိုယ့်ကိုကြိုးတုပ်မထားခဲ့ပါနဲ့
နုံးမရှိတဲ့နွံထဲမှာ ကိုယ့်စိတ်တွေ လှိုက်မောနေရင်းက စုန်းစုန်းမြုပ်တော့မယ်လေ
ဂျိုချက်ကင်းတဲ့ ကိုယ့်နှလုံးသားပေါ် ညှင်ညှင်သာသာလေးပဲ ဖြတ်လျှောက်ပေးပါ ညီမလေး
သက်ပြင်းချပေမယ့် သက်သာရာတော့မရပါဘူးလေ စကားလုံးတွေပြေးလွှားနေတဲ့ ကိုယ်ကဗျာပေါ်မှာ
gigabyte တွေသိပ်အများကြီးမရှိတဲ့ ကိုယ့်စိတ်ကူးအခန်းလေးထဲမှာ ညီမလေးက နေရာအပြည့်ယူထားခဲ့တယ် မိုးဦးကျမျက်ဝန်းလေးတွေကို ညင်ညင်သာသာလေး ခိုးကြည့်မိတယ်
စိုစွတ်စွတ် မျက်ဝန်းတွေမှာ လှိုက်လှိုက်လှဲလှဲ ပျော်ဝင်ခဲ့ရပြီ ညီမလေးရယ်
မျက်ဝန်းလေး တစ်ချက်အဝင့်ပါပဲ...... သူငယ်ချင်းရယ် ငါ့ကိုမင်းဆဲလိုက်ပါ
ငါ့အတွက်တော့ ညီမလေးရဲ့ မျက်ဝန်းလေးတစ်ချက် အဝင့်ပါကွာ....
ကိုယ့်အတွက် ကောက်ရိုးတစ်မျှင်မပေးပါနဲ့ နွယ်တစ်ပင်မပေးပါနဲ့
အဲဒီ နွံလေးထဲမှာ ကိုယ်နှစ်သက်စွာ ပျော်ဝင်ပါရစေတော့ကွယ်...။

ကျော်ဦး (လှိုင်)

လေးသံကြားက သူငယ်ချင်းများအတွက်ကဗျာ

ရိုးသားရင်းနဲ့ တစ်ခါတစ်လေတော့
အရိုးနဲ့အသား တစ်စစီဖြစ်သွားတတ်တယ်
မှတ်ကျောက်တင်မခံတဲ့  ကိုယ်ကျင့်တရားတွေ
ကမ္ဘာနဲ့အဝှမ်း တစ်ပုံတစ်ပင်ရှိနေရဲ့
We are the world ကိုပြန်သင်ပေးရမယ် သူငယ်ချင်း
အနာဂါတ်အတွက် အသက်ဆက်မယ့်လက်တွေ အဖြူချည်းသက်သက်တော့ မျှော်လင့်လို့မရဘူး
အဆက်မပြတ်စီးဆင်းနေတဲ့ ဒုက္ခခေတ်ကြီးမှာ ကံကိုအဖြူအမည်းရောဖို့ ဝန်မလေးဘူး
ခပ်ညစ်ညစ် အရောင်တွေက ထင်ထင်ရှားရှား
ခေတ်တစ်ခုမှာ ရေနှစ်ခါချိုးဖို့ ကြံစည်တဲ့လူတွေက ကာလတစ်ခုကို အမှောင်ချခဲ့ကြပြီးပြီ
ဓါတ်ကြီးလေးပါးက ဖောက်ပြန်တတ်တာပဲ အိပ်/စား/ကာမ ထဲမှာလည်ပတ်နေတဲ့
သွေးတွေထဲမှာ ဗြဟ္မစိုရ်တရား ခပ်ပါးပါလေးတော့ စွန်းထင်းပေးပါ
အူသံပေးနေတဲ့ ခွေးအတစ်အုပ် မစားရတဲ့အမဲ အရိုးကိုက်ဖို့စောင့်နေတယ်
ဟိန်းဟောက်သံတွေကြား ပြားပြားဝပ်နေခဲ့ရတာ မင်းလည်းခေါင်းမဖော်နိုင်ခဲ့ဘူးလေ
သခင်မျိုးဟေ့ တို့ဗမာတဲ့လား သူငယ်ချင်း
ကျွန်စနစ်ကြီး ပပျောက်သွားပြီတဲ့လား သူငယ်ချင်း
ကမ္ဘာရဲ့အချိုးကျ ရောစပ်မှုမှာ ပျော်ဝင်နိုင်အောင် လေ့ကျင့်နေရတုန်းပဲလေ
နှလုံးသားရဲ့တစ်နေရာမှာတော့ ငါတို့ ဒီမိုကရေစီရနေခဲ့တယ်
ကဗျာပေါ့ သူငယ်ချင်းရယ်....
ခါးမှန်းသိပေမယ့် အကြာကြီးဝါးနေရတုန်းပဲ
ကိုယ့်အတွက် မဟုတ်တဲ့လမ်းမှာ ဆန်ပြီးလျှောက်ခဲ့ရတာ
တစ်ခါတစ်ခါတော့လည်း ရင်ဘတ်တွေကျိန်းစပ်တယ်
လူ့အခွင့်အရေးဆိုတာ ငါတို့အတွက် လက်တစ်လုံးခြားထားတဲ့ လုပ်ဇာတ်ပါကွာ
သုံးဆယ့်တစ်ဘုံကြားက နေရာသေးသေးလေးမှာ ငါတို့လိပ်စာမှားနေခဲ့တာပါ
အဲဒီမှာပေါ့ သူငယ်ချင်းရယ်..
စပါးလုံးတစ်ထောက်စာအရေပြားအတွက် အသည်းကွဲခဲ့ရတယ်
စိတ်ဓါတ်ခွန်အားတွေ အညွှန့်ချိုးခံရတယ်
သမာအာဇီဝ တရားတွေ ခေါင်းပုံအဖြတ်ခံရတယ်
ကိုယ်ပိုင်အချိန်တွေ ဘာမှန်းမသိတဲ့ ဥပဒေအောက် ခေါင်းငုံခဲ့ရတယ်
ရစ်သမ်ပျက်နေတဲ့ ဘောလုံးအသင်းလို စိတ်တွေက ကစဉ့်ကလျား
ပျက်ကွက်မှုတွေ တစ်ထွေးကြီးနဲ့ငါ့ကို ခွင့်လွှတ်ပါ သူငယ်ချင်းရေ
သူ့အရပ်နဲ့သူဇာတ်မှာ ကိုယ်က မင်းသားလုပ်ချင်လို့မှမရခဲ့တာ
ငြိမ်းချမ်းရေးစကားလုံးတွေ စီတန်းလှည့်လည်ဖို့ ပျက်ကွက်ခဲ့ရပြီ
သူငယ်ချင်းရေ..ရရစားစားလုပ်နေခဲ့တာ မဟုတ်ပါဘူး
ငါက စက်ရုံရဲ့ အထွေထွေအလုပ်သမားလေး တစ်ယောက်ပါ
မင်းဒင်ရဲ့သက်ခိုင်မွေးဖွားရာ မက္ခရာနယ်မြေမှာ နေတဲ့သူပါ
မဝရေစာ ခံစားချက်တွေနဲ့ ကဗျာလေးရေးမိတဲ့ကောင်ပါ
လောကကြီးအကြောင်း ပြောရလောက်အောင် မကြီးကျယ်ပါဘူး
အချစ်အကြောင်း ဒဿနတွေ ပြောရအောင်လည်း နားမလည်ပါဘူး
မြေပြိုလို့ လန့်ပြေးမိတာ အထိအခိုက်တော့ နည်းနည်းရှိမှာပေါ့လေ..
သူတို့တွေမှာ မင်းနဲ့ငါတို့တွေအတွက် အရသာမရှိတဲ့ ဆက်ဆံရေးသာရှိပေမယ့်
ကဗျာတွေကြားမှာ သွေးကြောထဲက အရသာတွေက အတိုင်းသား
ကိုယ့်မာနတွေကို တာဝန်တွေကြားမှာ သားသတ်သလို သတ်ထားရတယ်
အဆင်းလည်းခက် အတက်လည်းခက်တဲ့ လောဘယာဉ်တွေကို မုန်းပေမယ့်
ကိုယ့်လုပ်အားနဲ့ သူ့ဆန်စားအပြောခံနေရတဲ့ ငါ့ကို ခွင့်လွှတ်ပေးပါသူငယ်ချင်းရေ
ဒါ ညောင်သီးမစားနိုင်ပဲ လေးသံသက်သက်နားထောင်နေရတဲ့ အရပ်ကခံစားချက်တစ်ချို့တစ်ဝက်ရယ်သာ..။

ကျော်ဦး (လှိုင်)

ကျွန်တော်/သူမနဲ့အချစ်ကဗျာ

(၁)

ပုံစံကျဖို့ သီအိုရီတွေကြား အသက်ရှင်ရတာ ရိုးရာဆန်လွန်းတယ် ကောင်မလေးရေ။ ကမ်းကိုလှမ်းပစ်ခံရတဲ့ လှိုင်းတွေလို ကိုယ့်စိတ်တွေက တလိမ့်လိမ့်ပေါ့။ အမိုးမပါတဲ့ ကောင်းကင်ပြာအောက်မှာ လျှောက်ဖူးခဲ့တာ အိပ်မက်တစ်ခုသာ။ ကောင်မလေးရေ အချစ်ပင်လယ်မှာ ကိုယ်က ကမ်းခြေအတုတစ်ခုတဲ့လား။ ခိုနားရာလေး တစ်ခုက မျက်ရည်တော့ ကျဖူးခဲ့တာပဲလေ။ မိုးတိတ်ဖို့ အော်ဆဲနေလို့မှ မရပဲကွယ်။ ဝဋ်ကြွေးကြီးတယ်လို့သာ သတ်မှတ်လိုက်ကြတာပေါ့။ စကားတစ်ခွန်းဆိုတိုင်း နုတ်ခမ်းပါးလေးနဲ့ အသတ်ခံရတာ အကြိမ်ကြိမ်။ အေးခဲသွားတဲ့ ဆက်ဆံရေးက ကိုယ့်အတွက် ခံရခက်လွန်းတယ်ကွယ်။

(၂)

အဲဒီနေ့က ကောင်မလေးကို အပြာရောင်လွင်တဲ့နေ့လေး ရွတ်ပြခဲ့ဖူးတယ်။ ကိုယ့်ကဗျာလေး ဟားတိုက်စရာ ဖြစ်ခဲ့သေးတယ်။ ခွင့်လွတ်ပါ ကောင်မလေးရေ ကိုယ်က ရှယ်လီတို့ ဘိုင်ရွန်တို့မှ မဟုတ်ခဲ့တာ.။ ကိုယ့်အိပ်မက်မှာတောင် ကိုယ်က ဇာတ်လိုက်မဖြစ်ခဲ့တဲ့ကောင်။ ဒါပေမယ့်တီးတိုးလေးရွတ်ပြချင်တာက ကိုယ်သိပ်ချစ်တယ်ကောင်မလေးရယ်။ သနားခြင်းဆိုတဲ့ ကရုဏာ ရချင်လို့ မဟုတ်ခဲ့ဘူး။ ကိုယ့်ဆီမှာ အချစ်နဲ့ဖလှယ်စရာ ဘာမှမရှိဘူးလေ။ အသိုက်ပျက်နေတဲ့ ငှက်တစ်ကောင်လို ကိုယ့်မှာ လွပ်လပ်ခြင်းတွေပဲရှိခဲ့တယ်။ ကိုယ့်အားနည်းချက်က လေထန်ရင် သိပ်ပြီး ပျံသန်းရဲတဲ့ကောင် မဟုတ်ဘူး။ အတ္တဆန်တဲ့ မုန်တိုင်းတွေကိုသိပ်ကြောက်တယ်ကောင်မလေးရေ..။

မှတ်မိသေးရဲ့လားကွယ်။ ကောင်မလေးကိုစတွေ့တော့ အသားအရေဝင်းဝင်းမှာ အနီရောင်ဆင်မြန်းပြီးတော့ပေါ့။ မျက်နှာရှင်းရှင်းလေးမှာ ဆံနွယ်တွေ ခွေကျနေတာ ဆံပင်လေးတွေကို မနာလိုလိုက်တာ ကောင်မလေးရယ်။ ကြည်လင်နေတဲ့မျက်လုံးလေးတွေက ကိုယ့်နှလုံးသားကို ထိုးဖောက်မြင်သွားခဲ့ပြီလား။စကားပြောလိုက်တိုင်း နုတ်ခမ်းပါးပါးလေး လှုပ်ရှားပုံက ကိုယ့်အတွက် အလှဆုံးပေါ့။ ရိုးရိုးရှင်းရှင်းလေးနဲ့ သနပ်ခါးပါးပါးလိမ်းထားတဲ့ ပါးပြင်ညက်ညက်ကလေးကိုကြည့်ရင်း အဲဒီနေ့က ကိုယ့်ရာသီဥတုလေး သိပ်သာယာခဲ့တယ်။ မနက်နဲ့ညတိုင်း ကောင်မလေးရှင်းတမ်းတွေပဲ ကိုယ့်ခုံရုံးမှာ ထုတ်ပြန်နေမိတယ်။ ရင်ခုန်သံချင်း တံတားခင်းဖို့ ကိုယ်ရေးပေးတဲ့ကဗျာလေးဖတ်ပြီး သွားတက်လေးပေါ်ရုံပြုံးနေလိုက်တာ။ ကိုယ့်စိတ်ထဲမှာ အကြိမ်ကြိမ်အထပ်ထပ် သိပ်ချစ်တာပဲ ကောင်မလေးရယ်။

“ ဆံပင်တွေ အရမ်းရှည်နေပြီနော်.. ညှပ်လိုက်တော့ ”

အမိန့်သံဆန်ဆန် စကားလုံးအောက် ကိုယ် တရိုတသေပဲ နာခံလိုက်တယ်။

“ သိပ် လိမ္မာတာပဲ ”

ကိုယ်က အိမ်မွေးတိရိစ္ဆာန်မဟုတ်ပေမယ့် ကောင်မလေးရဲ့ ချိုလွန်းတဲ့ အပြုံးတွေထဲမှာ မာနခပ်ယဲ့ယဲ့လေးသာ ကျန်တော့တာပါကွယ်။ ကောင်မလေးရယ် ကိုယ့်လက်မောင်းကို ညင်ညင်သာသာလေး နမ်းလိုက်ပါ။ မင်းရဲ့အနမ်းတစ်ချက်က ကိုယ့်သွေးပြန်ကြောတွေကို လှုပ်နှိုးနိုင်လို့ပါ။ အိပ်ငွေ့ချထားတဲ့ ကိုယ့်မနက်ခင်းလေးတွေ စိုစိုပြေပြေ ဖြစ်စေလို့ပါလေ။
ကိုယ်နဲ့ကောင်မလေး အဲဒီနေ့က စကားတွေအများကြီး ပြောဖြစ်ကြတယ်။ ကိုယ်က မာယာကော့ဖ်စကီးကို အားကျတယ်ဆိုတော့ ကောင်မလေးက ကိုယ့်ကိုသေနတ်ဝယ်ပေးရမလားတဲ့လေ။ စကားသိပ်တတ်တဲ့ ကောင်မလေးကို ချစ်တယ်။ မနက်ဖြန်တွေကို အပိုင်ပေးလိုက်ချင်တယ်။ ကိုယ့်လူငယ်ဘဝလေးမှာ ကောင်မလေးပြောဖူးတဲ့ ကိုယ်တစ်ခြမ်းဆိုတာကို ယုံကြည်သက်ဝင်ခဲ့တယ်။ စွယ်တော်ရွက်တစ်ရွက်ကို စာအုပ်ကြားထဲညှပ်ပြီး ခပ်တည်တည်နဲ့ ဒိုင်ယာရီတွေ ရေးခဲ့ဖူးတယ်။

(၃)

မီးကျိုးမောင်းပျက် စိတ်ဓါတ်တွေကို ကောင်မလေးရဲ့ သနပ်ခါးနံ့သင်းနေတဲ့ ပါးပြင်လေးနဲ့ ပြင်ဆင်ခွင့်ပေးပါ။ တစ်ခါတစ်ခါတော့ ကိုယ်လည်း ဆိုးမိုက်လိုက်ချင်တာပေါ့။ ကောင်မလေးနဲ့ကိုယ့်ကြားမှာ ဖောက်ထွင်းမြင်နေရတဲ့ ခပ်ပါးပါးနံရံလေးတစ်ချပ်ပဲရှိနေတာပါ။ မာသာထရီဇာဆန်ဆန်လက်ကလေးနဲ့ ကိုယ့်အမှားတွေကို ချေဖျက်ပေးပါ။ ကိုယ်စိုက်တဲ့ အပြာရောင် သစ်ပင်လေးက အပြာရောင်စစ်စစ်လေးတော့ မထွက်ခဲ့ပါဘူး။

“ ကောင်လေးကို အရမ်းသနားတာပဲ ”

ကိုယ်သိပ်ကြောက်ရွံ့တဲ့ စကားလုံးက ကောင်မလေးနှုတ်ဖျားကနေ ခုန်ဆင်းကျလာခဲ့တယ်။ မပြောလိုက်ပါနဲ့ ကောင်မလေးရယ် စိတ်ထဲကနေ ကိုယ်မိုးမွှန်အောင် တောင်းပန်နေခဲ့ပါတယ်။ ကိုယ်ရဲ့ အဆိုးဘက်ယိုင်ချင်နေတဲ့ စိတ်ကလေး လှုပ်ခတ်သွားပြီးကွယ်။
ကောင်မလေးရဲ့ အပြုံးလေးတစ်ချက်နဲ့ တည့်မတ်ပေးပါအုံးကွယ်။ အစိုးမရနိုင်တဲ့ ပြောင်းလဲမှုတွေကြားမှာ အတ္တခါးခါးတွေကို ကိုယ် ကြိတ်မှိတ်ပြီးမျိုချနေရပါပြီ။ အဆုံးသတ်ကို မှတ်မှတ်သားသား သိနေခဲ့ပေမယ့် မာယာဖြူဖြူလေးနဲ့သာယာမှုကို ဆမတူပေမယ့် လဲခဲ့တာ ကိုယ်မမှားဘူး။ ဒါပေမယ့် ဆေးလိပ်ဖွာရှိုက်လိုက်တိုင်း အငွေ့ရိုင်းတွေ ထွက်သွားတာကြည့်ရင်း ကိုယ့်ဘဝကတဖြည်းဖြည်းတိုလာတယ် ကောင်မလေးရယ်။ ခံစားစရာမရှိတဲ့ အနာဂါတ်မှန်းတော့သိပါရဲ့ ကိုယ့်ပိုက်ကို ကိုယ်တိုင်ယက် ကိုယ်တိုင်အပ်ပြီး ကိုယ်တိုင်တိုးဝင်ပေးခဲ့တာလေ။ နောင်တဆိုတာ ကိုယ့်အတွက် ဘာအရသာမှ မရှိခဲ့ပါဘူး။ ကိုယ်လည်း ပိုင်ဆိုင်ခြင်းဆိုတာကိုတော့ ခံစားကြည့်ချင်တာပေါ့ကွယ်။

“ ကောင်မလေးတို့ လမ်းခွဲကြရအောင် ”
“ နားလည်ပေးပါ ကောင်လေးရယ်”

ကိုယ့်နားထဲကို မိုင်းဗုံးတစ်လုံး ပစ်သွင်းလိုက်သလိုပါပဲ။ မျှော်လင့်ထားခဲ့ပေမယ့် အထိနာသွားတဲ့ ကိုယ့်ရင်ဘတ်က နာကျင်လွန်းလို့ အော်ညဉ်းနေခဲ့ပြီ ကောင်မလေးရယ်။ ကွဲရှတတ်သည်ဆိုတဲ့ ပစ္စည်းတွေကို ဝုန်းခနဲပစ်ချလိုက်သလိုပါပဲ ကိုယ့်နှလုံးသားတွေ တစ်စစီဖြစ်ခဲ့ရပါပြီ။ မိုးရယ် သည်းသည်းမည်းမည်း ရွာချလိုက်စမ်းပါ။ ကိုယ့်မျက်ဝန်းထဲက ကျလုဆဲဆဲ ဝမ်းနည်းမှုတွေကို ကောင်မလေးမသိစေချင်လို့ပါ။ ကောင်မလေး သနားစိတ်တွေနဲ့ ကိုယ့်ကိုထပ်ပြီး မငြိတွယ်စေချင်တော့ဘူးလေ။ ကိုယ့်မျက်နှာပေါ်မှာ ကောင်မလေးနဲ့ကိုယ် နှစ်ယောက်တည်းနားလည်တဲ့ အပြုံးတစ်ခု ကိုယ်ဖန်ဆင်းနိုင်အောင် ကြိုးစားလိုက်တယ်။ ကိုယ့်စိတ်ထဲမှာတော့ မထားခဲ့ပါနဲ့ ကောင်မလေးရယ်လို့ အကြိမ်ကြိမ် ငိုညဉ်းမိနေတာ အသေအချာပါပဲကွယ်။

ညနေခင်းကလည်း အပျိုရိုင်းဆန်ဆန် မာယာတွေဖုံးလွှမ်းထားတယ်။ အမှတ်လွဲနေတဲ့ ပြက္ခဒိန်က ဖောက်ပြန်ခဲ့တာလား။ သတင်းတစ်ခုက ကြိုသိပေမယ့် တကယ်ကြားရတော့ ကိုယ့်ရင်ထဲမှာ ပြည်တွင်းစစ်ဖြစ်ခဲ့ပေါ့။ မြတ်မြတ်နိုးနိုးနမ်းခဲ့တဲ့ ဆံနွယ်လေးတွေပျောက်ရှ။ သိပ်ချစ်စရာကောင်းတဲ့ အမာရွတ်နဲ့လက်ကလေးက နုတ်ဆက်ပြီတဲ့လားကွယ်။ ကောင်မလေး လက်ထပ်တော့မယ်တဲ့။ ကိုယ်က သိသိကြီးနဲ့ လာမယ့်ဓါးကို ကျောခိုင်းပေးခဲ့တာပါကွယ်။ အသံမထွက်ပဲ မျက်နှာဖုံးတပ်ထားပေမယ့် နှလုံသားက တစချင်းစီပေါ့။ အသည်းကွဲကဗျာတစ်ပုဒ် အဆုံးသတ်က ကာရန်တွေ လစ်လျူရှုခြင်းခံရပြီ။ ဆိုခဲစေ မြဲစေအတိုင်း ငိုသံတွေမထွက်ခဲ့ပေမယ့် ရှိုက်သံတွေက ပဲ့တင်ရိုက်ခတ်။ ကိုယ်တို့ရဲ့ခုံတန်းလေးမှာပဲ ကိုယ်မရေးတတ်တဲ့ အချစ်ကဗျာလေးက အသက်မဲ့နေခဲ့ပါပြီ ကောင်မလေးရေ...။ ကောင်မလေးဆီက စာလေးတစ်စောင်ကို ကောင်မလေးရဲ့နောက်ဆုံးလက်ရေးလေးအနေနဲ့ ကိုယ်သိမ်းထားပါတယ်။
“ကောင်မလေး လက်ထပ်ရတော့မယ်ကောင်လေးရယ် ”တဲ့လေ။ ကိုယ့် ဒိုင်ယာရီလေးထဲက နောက်ဆုံးစာမျက်နှာလေးမှာ စွယ်တော်ရွက်ခြောက်လေး တစ်ခြမ်းနဲ့ နေ့စွဲတစ်ခုပေါ်က လက်ရေးလှလှလေး တစ်ခုကို တစ်သက်စာအတွက် ညှပ်ထားလိုက်ပါပြီကွယ်။

“

ကျော်ဦး (လှိုင်)

ဂဏန်းနဲ့ဆော့ကစားသူများ

တောင်ကျချောင်းရေကဲ့သို အရှိန်အဟုန်ဖြင့်စီးဆင်း
လွပ်လပ်ခြင်းတွေနဲ့ နှင်ခဲ့တဲ့ ခရီးပြင်း
မာမာထန်ထန်နဲ့ မျှောလို့လာလိုက်တာ
ကိုယ့်ရှူးကိုယ်ပတ် တဲ့အထိ
အခုတော့ ခေတ်ကျန်ခဲ့တာလား ခေတ်နောက်လိုက်တာလား
ခါးခါးသီးသီးငြင်းလို့ ရောက်တဲ့အရပ်မှာနေခဲ့ပါတယ်
ရန်သူတစ်အုပ်နဲ့ ဝပ်ကျင်းမှန်းတော့ မသိခဲ့ဘူး
လှေမျောလို့လှေနဲ့ပဲ လိုက်ခဲ့ကြတာပဲ
လူမျောလေတော့ ဘာနဲ့လိုက်ဖို့စဉ်းစား
ဓါတ်ဆီနဲ့မီးခြစ် မအပ်စပ်ပေမယ့် လိုက်ဖက်မှုရှိတယ်
ပဲပင်ပေါက်နဲ့ပဲပြား ကြာကြာဝါးနေပေမယ့် ခါးမှန်းတော့သတိမရတော့ဘူး
ဆိတ်ဆိတ်နေကြလျက် ဝမ်းတထွာအရေး လုံးပမ်းလိုက်ကြ
မမိနိုင်တဲ့ငါးတွေကို စိတ်ကူးနဲ့ဖမ်းနေကြပေါ့
လွတ်တဲ့ငါးကကြီး ဂဏန်းနှစ်လုံးအာရုံဖမ်းစမ်း
ဘုရားလည်းမနေအား ဘုန်းကြီးလည်းမနေအား
တို့လူမျိုးများ ကစားစရာရှားလို့ ဂဏန်းနဲ့ကစားကြ
ဂဏန်းညှပ်မှ “အမိ”တ ဘဝ ဘဝလို့ရွတ်ကြ
သောကတွေများရတဲ့ ဒီအားတိုင်းကစားတဲ့အားကစား
ဘယ်တော့များမှ အနားရကြမယ်မသိ
အိမ်ကွဲ လူကွဲ ဘဝတွေကွဲ အသိုက်မမြဲလို့နေပေမယ့်
ဒါကမှ လူရာဝင်သလို အပျိုအအိုအကိုတွေ
ဇီးကွက်စီပွားရေးစနစ်ထွန်းကားလာ ဖာသိဖာသာနေကြ
ဒီနေ့ကတော့ ပူးလိုက် ပေါင်းလိုက် ခွလိုက်နဲ့ စိတ်ပျက်စရာနေ့ပဲလေ..။

ကျော်ဦး (လှိုင်)

ကျနော်မပိုင်ခဲ့သော ပစ္စည်းစာရင်း

လွန်ခဲ့သော အချိန်ပိုင်းများမှတဆင့်
လွန်ခဲ့သော နှစ်များဆီသို့....
မိုးသောက်ယံလွမ်းချင်းတစ်ခု
မညှာမတာတွေးရင်း ရေးခဲ့မိတယ်

ကိုယ့်ဘေးက ရဲဘော်ရဲဘက်
ဘောပင်နဲ့စာရွက်က ကိုယ့်ကိုရန်လုပ်နေခဲ့

ကိုယ်မြတ်နိုးတဲ့ ဂစ်တာတစ်လက်က
ကိုယ့်အတွက် ကြိုးတွေ အဆင်သင့်ပြတ်ပေးနေခဲ့

အစီခံမရှိတော့တဲ့ စီးကရက်တစ်လိပ်က
သူ့ကိုယ်သူမီးရှို့ရင်းနဲ့ ကိုယ့်အတွက်
တစ်ပိုင်းတစ်စ ငိုချင်းတွေချနေရဲ့

ကိုယ်ရဲ့ကိုယ်တွင်းက သက်ပြင်းတစ်ချု့်
အရှိန်ခပ်ပြင်းပြင်းနဲ့ စီးဆင်းသွားချိန်
ကိုယ့်ရဲ့မပိုင်ဆိုင်တဲ့ လေတစ်ချို့ကို ဖမ်းနေခဲ့တယ်

မနက်ခင်းရဲ့ နိုးထမှုနဲ့ပြန်ဆန်းစစ်တော့
ကိုင်တွယ်မှုကို စေခိုင်းစရာ လက်နှစ်ဖက်
ကိုယ်မကြိုက်တဲ့အရာတွေ အနားကခွာဖို့ ခြေနှစ်ဖက်
ကိုယ့်ရဲ့စိတ်ခံစားမှုတွေ အတွက်
တစ်နေ့ကို အကြိမ်တစ်သိန်းကျော်ခုန်နေတဲ့
ပင်ပန်းနေတဲ့ နှလုံးသားတစ်ခု
ခေါင်းအစခြေအဆုံး တစ်ကိုယ်လုံးအတွက်
ပညတ်နာမ တစ်ခုရယ်....

တကယ့်တော့....
အဲဒါတွေက ကိုယ့်ကို ဂျစ်ကန်ကန်လုပ်နေခဲ့တယ်..။

ကျော်ဦး (လှိုင်)

ကျနော် ငိုနေပါတယ်

ကျနော်ငိုနေတယ်..
ဒဏ်ရာရနေတဲ့ ကမ္ဘာကြီးအတွက်
ကျနော်နဲ့ ထပ်တူစီးမျောရင်းပေါ့

ကျနော်ငိုနေတယ်..
ကျနော့်လက်က ကျကွဲတော့မယ့် ကဗျာအတွက်
နုတ်ဆက်လက်ပြဖို့ ကြိုးစားရင်းပေါ့

ကျနော်ငိုနေတယ်...
ပိုင်ဆိုင်ခွင့်မရှိတဲ့ ဆံနွယ်လေးအတွက်
ဆံခြည်တစ်မျှင်မလျော့ခဲ့ပါဘူး
 
ကျနော်ငိုနေတယ်....
သိပ်ကြားချင်တဲ့ ခေါ်သံလေးအတွက်
နှမြောတသစွာနဲ့ပါပဲ

ကျနော်ငိုနေတာ.....
အပ်တစ်ထောက်စာ အရေပြားလေးအတွက်
ကိုယ့်စိတ်နဲ့ကိုယ် တရားလက်လွတ်ပါပဲ

အဆုံးသတ် ငိုခဲ့ပါတယ်
ခက်ခဲလှတဲ့ ဆုံးဖြတ်ချက်တွေအတွက်
ပြေးမထွက်ချင်တဲ့ လမ်းပေါ်ကနေ
နာကြည်းမှုကင်းစွာနဲ့ အပိုင်ပေးလိုက်ရတဲ့ အရာတွေအတွက်
ကျနော် ငိုနေပါတယ်လေ...။

ကျော်ဦး (လှိုင်)

ညတစ်ခုရဲ့သရုပ်ဖော်တေး

အလင်းရောင်စတင်ကျရောက်တဲ့ အခန်းတွင်း
တစ်ခစ်ခစ်ရယ်သံနဲ့ ကလေးမ စင်သီယာ
သူ့လက်ထဲက ငွေတစ်ချို့က သွေးသံရဲရဲ
မျက်နှာမွှဲမဖြစ်စေချင်လို့ မျက်နှာလွဲပြီးခဲမပစ်ရက်ခဲ့
ခံယူချက် တစ်ချို့ကိုမေးကြည့်တော့လေ
အဲဒီစင်သီယာကပဲ.....
အသွေးအသားဈေးတွေ ကောင်းနေတယ်တဲ့
အဲဒီစင်သီယာကပဲ.....
ကုန်ဈေးနှုန်းတွေ ကောင်းနေတယ်တဲ့
အဲဒီစင်သီယာကပဲ.....
မိသားစုကို ထမ်းပိုးထားရတယ်တဲ့
ငါမြင်လိုက်ရတယ် စင်သီယာ..
မင်းနှလုံးသားဆီက ဒဏ်ရာနက်တွေ
ရောင်းစားလိုက်ရတဲ့ နုပျိုခြင်းတွေ
ဦးတည်ရာမဲ့သွားတဲ့ ရည်ရွယ်ချက်တွေ
ဆုံးရှုံခြင်းများစွာနဲ့ မင်းကိုပေါ့ စင်သီယာ..
ကိုယ်ချင်းစာပါတယ် စင်သီယာရေ...
မြင်တွေ့ခဲ့ရတဲ့ မင်းရဲ့ပူလောင်မှုတွေကို
အနာတွေက ရင်တလှပ်လှပ်နဲ့
မင်းကိုယ်မင်း စတေးရဦးမှာပေါ့ စင်သီယာ
ကံတရားက မျက်နှာလွှဲခဲပစ်မလုပ်မယ့်အထိပေါ့..။

ကျော်ဦး (လှိုင်)

အသက်ရှူမဝတဲ့ကဗျာ

စေစားလွန်းတဲ့ ကံတရားက အရိပ်နေနေ အခက်ချိုးချိုး
လောဘပဒေသာပင်ကြီးက သားရေပေါ်အိပ်သားရေနားစား
မကျေနပ်မှုတွေ ငြိမ်းချမ်းစွာနဲ့ပဲ ဆန္ဒပြ
လေထဲပစ်တဲ့ခဲကလည်း ပလုံခနဲထမြည်လို့မြည်
ခံစားချက်တွေက မြို့ပတ်ရထားတစ်ပတ် လက်မှတ်မပါပဲစီး
အိပ်မက်တွေက တရေးနိုးလို့ လမ်းထလျှောက်
ကုန်ဈေးနှုန်းတွေက ဆင်စီးလို့မြင်းရံနေတယ်
လူငယ်တွေက အဆီစားလို့အသားဖြစ်မထွန်း
သစ္စာတရားဆိုတာက ဘာကျက်ကျက်စားတဲ့ခေတ်
ရာသီဥတုက အနတ္တတရားကိုအပိုင်စားယူထားခဲ့
အလင်းရောင်တွေက နေ့မြင်ညပျောက်
ဝါဒတွေက သဘာဝနဲ့ အတိုက်အခံလုပ်
ကတ္တရာလမ်းတွေက ဆီမထည့်တဲ့ တံခါးလိုအော်
အဲဒါ အသက်ရှူလမ်းကြောင်း ပိုးကောင်ဝင်နေတဲ့အရပ်ပေါ့ဗျာ..။

ကျော်ဦး (လှိုင်)

နှင်းဝှက်တဲ့ဆောင်း

အိပ်မက်ဆိုးရဲ့ မျက်ရည်တွေက
အရှိန်အဟုန် ခပ်ပြင်းပြင်းအတိတ်တွေနဲ့
နှလုံးသားတစ်ခုဆီ တသွင်သွင်စီးနေခဲ့
ဒီဇင်ဘာ နိမိတ်ဆိုးတွေက
မကာရ ရဲ့ ရာသီစာတဲ့လား ညီမလေးနှင်းရေ

မျက်စိတစ်မှိတ်ဆိုတဲ့ ကာလလေးတစ်ခု
လူတစ်ချို့ကို မျက်ကွယ်ပြုပြီးတော့
ဖြူစင်မှုတွေကို စားသုံးခဲ့ကြဖူးတယ်လေ
ညီမလေးနှင်းရေ......
အဲဒီအပျိုဖော်ဝင်စ ဆောင်းကပြည့်စုံနေခဲ့ပေါ့

အဲဒီနေ့က မိုးတွေရွာတယ် ညီမလေးနှင်းရေ
ဆောင်းရဲ့သခင် နှင်းတွေပျောက်ခဲ့ခြင်းနောက်
အရောင်မွဲနေတဲ့ မျက်နက်ဝန်းနဲ့
တဆတ်ဆတ်တုန်နေတဲ့ ဖြူစွတ်စွတ်နုတ်ခမ်း
ဘုရားသခင်ရဲ့ မတရားမှုအောက်မှာ
နုတ်ဆက်စကားတွေ ဆိုချင်သတဲ့လားကွယ်

ဟုတ်တယ် ညီမလေးနှင်းရေ...
ဒီနှစ်ဆောင်းလည်း မိုးသက်မုန်တိုင်းကျခဲ့ပေါ့
အလွမ်းတွေ စီတန်းလို့နေရာယူပေမယ့်
ကျန်နေတဲ့ အသက်ဓါတ်လေးအတွက်
ဆက်လက်ရှင်သန်နေရဦးမယ်လေ
ဒါပေမယ့်.. ညီမလေးနှင်းရယ်
ဒီဆောင်းက မုဆိုးဖိုဆန်လွန်းနေတယ်ကွယ်

ညီမလေးနှင်းရေ...
အေးစက်စက် ထုံကျင်ကျင် အမှတ်တရတွေနဲ့
ကိုယ့်ရဲ့ဆောင်းတွင်းက ခေတ်ပျက်နေခဲ့ပေါ့
အဲဒီဆောင်းမှာ.. ရင်ငွေ့နွေးနွေးမရှိတော့ဘူး
ထိုင်နေကျ ခုံတန်းလေး မရှိတော့ဘူး
အနမ်းတစ်ခုလွမ်းနေတဲ့ ဆံနွယ်လေးတွေ မရှိတော့ဘူး
သဝန်တိုခဲ့တဲ့ ကိုယ်သင်းနံ့လေး မရှိတော့ဘူး

တကယ်တော့.. ညီမလေးနှင်းရေ...
ကိုယ့်ဆောင်းတွင်းမှာ နှင်းပျောက်သွားတာ ကြာပါပြီကွယ်...။

ကျော်ဦး (လှိုင်)

အစိမ်းသက်သက် စီးချင်းထိုးခံရခြင်း

ရင်ဘတ်ထဲက ထွက်ကျလာတဲ့အနာက
ကျနော့်ကို သွေးမထွက်ပေမယ့် မျက်ရည်မတိတ် စေခဲ့ပါဘူး
စပါးလုံးတစ်ထောက်စာ ရင်ဘတ်အနာ တိုက်စားမှုက
ဘဝတစ်ခုလုံးကို ချုပ်ရိုးကျဲကျဲနဲ့ အစိမ်းချုပ်ချုပ်လိုက်တယ်
ချုပ်ရိုးတစ်ချက်ဖြည်တိုင်း သုညတစ်လုံးစီထွက်ကျလာခဲ့ပေါ့
စကားလုံးတွေကို ဈေးမကောင်းတဲ့ခေတ်မှာ
ဈေးမဆစ်တတ်တော့ တပန်းရှုံးတာက အယုံသွင်းခံရတယ်
သေလောက်အောင်လွမ်းပေမယ့် လျစ်လျူရှုတဲ့ ကြည်စားမှုက
သူမအတွက်တော့ စိတ်ကျေနပ်စရာ ကောင်းနေမှာပေါ့လေ
ငါ့ရဲ့ ကလီယိုပက်ထရာလေးရေ......
ငါ့ကို အဆိပ်ခပ်ပြင်းပြင်းတစ်ခွက် စပ်ပေးစမ်းကွယ်
ငါလည်း တစ်ခါတစ်လေ မိုက်မဲခဲ့ပါတယ်
အိပ်မက်ဆန်တဲ့ခံစားမှုတွေနဲ့ အသက်ရှူသံတီးတိုးနဲ့
အသွားပြောင်းပြန် ဓါးတစ်လက်နဲ့ အေးစက်စက်အပြုံး
တပ်မက်စရာ ရယ်သံချိုချိုနဲ့ နှလုံသားကို ရစရာမရှိအောင်မျှားနေခဲ့
စကားတွေနဲ့တော့ စစ်ထိုးမနေပါနဲ့တော့လေ....
ကိုယ်တို့ငြိမ်းချမ်းရေးလေး အသက်ငင်နေတာ သနားစရာကွယ်...။

ကျော်ဦး (လှိုင်)